Половина администрација излезе на улица, бараат поголеми плати
Конфедерацијата на слободни синдикати се закани со генерален штрајк на 3-ти и на 4 декември. Првиот човек на Синдикатот на УПОЗ и претседателката на Независниот синдикат на судската администрација многу му се налутија на вицепремиерот Фатмир Битиќи
Вработените од судската и во јавнообвинителската служба, Фондот за здравство, како и од Канцеларијата на Народниот правобранител, во организација на Синдикатот на работниците од управата, правосудните органи и здруженијата на граѓани (УПОЗ) денеска излегоа на протест пред Собранието, од каде што ги повикаа пратениците од сите политички партии, пред кои веќе е предлог-буџетот за следната година, да ги поддржат во нивните барања за покачување на платите. На овој протест беше и Независниот синдикат на судската администрација и Конфедерацијата на слободни синдикати.
Претседателот на Синдикатот на УПОЗ Трпе Деаноски вели дека штрајкот во обвинителството трае веќе два месеци, цела година има протести во судството, но во Буџетот за 2024 година нема ништо за работниците, ама има 78 проценти поголеми плати за функционерите.
