На грчки остров избувнаа два пожари — двајца загинати и стотици евакуирани

Две лица се пронајдени мртви на островот Саламис, недалеку од Атина, каде што денес речиси истовремено избувнаа два пожари и предизвикаа евакуација на стотици луѓе, според противпожарната служба, јави државната телевизија ЕРТ.

„Издадена е наредба за евакуација. Стотици туристи и постојани жители се погодени“, изјави портпаролот на противпожарната служба Јанис Артопиос.

Мобилизирани се стотици пожарникари и чамци

Два пожари беа забележани речиси истовремено во две популарни туристички области на југот и истокот од островот, прецизираше Артопиос.

Мобилизирани се околу 150 пожарникари и четири авиони и шест хеликоптери. Крајбрежната стража распореди пет брода.

Островот Саламис е омилена дестинација на Атињаните за време на празниците и викендите.