Индекс на мизерија: Најнесреќни земји во светот се Зимбабве, Венецуела и Сирија, Македонија се најде на 39. место
Годишниот индекс на несреќни земји на Ханке ги позиционираше Зимбабве, Венецуела и Сирија на првото место на најнесреќни земји од вкупно 157 земји кои се на листата.
Македонија го зазема 39. место, заедно со азиската држава Мјанмар, со 50,4 поени, а како главна причина за несреќено живеење се наведува невработеноста. За главни фактори се земени збирот на невработеноста на крајот на годината (помножена со два), инфлацијата и стапките на банкарските камати, минус годишната процентуална промена на реалниот БДП по глава на жител.
![](https://www.slobodenpecat.mk/wp-content/uploads/2023/05/%D0%A2%D0%B0%D0%B1%D0%B5%D0%BB%D0%B0-%D0%BD%D0%B0-%D0%BD%D0%B0%D1%98%D0%BD%D0%B5%D1%81%D1%80%D0%B5%D1%9C%D0%BD%D0%B8-%D0%B7%D0%B5%D0%BC%D1%98%D0%B8-%D0%B2%D0%BE-%D1%81%D0%B2%D0%B5%D1%82%D0%BE%D1%82.jpg)
Hanke’s 2022 Misery Index
Пред Македонија на листата на несреќни држави од регионот се најдоа Црна Гора на 34. место со 52,6 поени и нешто повисоко на листата е Босна и Херцеговина, на 18. место со 75,9 поени. Србија се најде на 54. со 41,1 поен.
Ниско на листата се најдоа Грција на 84 место, потоа Албанија на 97 место, а веднаш по нејзе е Хрватска на 98 место, додека Бугарија се позиционираше на 101. место, а Словенија на 118.
Последна на листата е Швајцарија, со само 8,5 поени, а причината за несреќа е невработеноста.
Британија е понесреќна од минатата година, искачувајќи се од 153-то на 129-то место на скалата.
Спротивниот тек го следеа САД , кои паднаа од 102 на 134 место.
Првите десет сè уште ги сочинуваат Либан, Судан, Аргентина, Јемен, Украина, Куба и Турција, односно земји кои се во средината на конфликти и длабока економска криза.