Излезни анкети: Крајно десната АфД победи на уште едни покраински избори во Германија
Партијата Алтернатива за Германија (АфД) денеска го освои првото место на покраинските избори во североисточна Германија, покажаа излезните анкети, што дополнително го засилува замавот на оваа крајно десничарска партија на национално ниво, во момент кога конзервативниот канцелар Фридрих Мерц се бори за политички опстанок, пренесува британската агенција Ројтерс.
Според излезните анкети на германскиот јавен радиодифузен сервис АРД, се очекува АфД да освои 37 проценти од гласовите во регионот Мекленбург-Западна Померанија, пред социјалдемократите од левиот центар со 35,5 проценти и далеку пред конзервативците на Мерц, кои освоија 5,5 проценти и едвај го поминаа прагот за влез во регионалниот парламент.
Сепак, малку е веројатно дека АфД ќе ја преземе власта, бидејќи другите главни партии ја исклучуваат можноста за соработка со неа.
Доколку се потврдат, изборните резултати би претставувале најслаб резултат за партијата на Мерц на кои било покраински избори од 1949 година.
Тоа исто така би била уште една победа на регионално ниво во рок од еден месец за АфД, партија која другите партии ја избегнуваат, но која води во националните анкети на јавното мислење.
На вторите избори, одржани во неделата во главниот град Берлин, крајнолевичарската партија „Левица“ освои 24,5 проценти од гласовите, додека конзервативците на Мерц добија 20 проценти, а АфД 16 проценти.
Резултатите можеби нема да бидат конечен удар за Мерц, кој минатата недела ја доби поддршката од осум конзервативни премиери на германските покраини.
Сепак, нискиот рејтинг, непопуларните реформи и победата на партијата АфД на неодамнешните избори во Саксонија-Анхалт ја доведоа во прашање неговата политичка иднина.
