Омер e балкански шампион во борење до 20 години

Македонскиот борач Омер Мемеди го освои златниот медал на Балканското првенство за борачи до 20 години, кое се одржува во Копривница, Хрватска.

Мемеди триумфираше во категоријата до 97 килограми, продолжувајќи ја успешната низа на настапи на меѓународната сцена. Во полуфиналето тој го совлада Турчинот Јунус Балџи, со што обезбеди место во финалето.

Претходно, Мемеди забележа две убедливи победи – против Илија Атанасов со 5-3 и против Романецот Балаш Лоринц со 9-2. IPON

За Мемеди ова е уште еден значаен успех во младинската конкуренција. Деветнаесетгодишниот борач настапува во слободен стил и веќе има сериозно меѓународно искуство. На Европското првенство до 20 години во 2026 година во Скопје стигна до четвртфиналето во категоријата до 92 килограми. 

Мемеди и претходно се искачи на балканскиот врв. Во октомври 2025 година ја освои титулата балкански шампион во конкуренција до 20 години, тогаш во категоријата до 92 килограми. 

Со новото злато, Мемеди потврдува дека е меѓу најуспешните македонски млади борачи и продолжува да ја гради својата позиција на меѓународната сцена.