Почна средбата Трамп-Зеленски

Средбата меѓу Доналд Трамп и Володимир Зеленски е во тек.

Двајцата лидери повторно се среќаваат шест месеци по жестоката расправија во февруари. Зеленски се надева дека ќе добие поддршка и конкретни акции од американскиот претседател, откако Трамп во петокот се сретна со рускиот претседател Владимир Путин. Подоцна вечерва Трамп ќе се сретне со европските лидери.

Како што забележа Би-би-си, заменик-шефот на кабинетот на Володимир Зеленски, Серхиј Палиса, беше виден како се приближува кон Белата куќа носејќи завиткан лист хартија.

Од далечина изгледаше како да носи мапа.

Американскиот претседател го поздрави Зеленски кога излезе од автомобилот, се ракуваше со него, а двајцата лидери разменија неколку збора.

Потоа застанаа заедно пред новинарите, насмевнувајќи се, но не одговарајќи на прашања. Во еден момент, Трамп ја стави раката околу Зеленски пред заедно да влезат во Белата куќа.

Тој рече дека САД би можеле да се обидат да преговараат за крај на украинската криза без прекин на огнот што би донел пауза во борбите.

Трамп рече дека ќе му се јави на Путин по средбата со Зеленски и дека е можно тројцата лидери да одржат заедничка средба, објави Ројтерс.

Тој, исто така, им рече на новинарите во Овалната соба дека штотуку индиректно разговарал со Путин.

Зеленски ѝ се заблагодари на Меланија за писмото до Путин

Володимир Зеленски му се заблагодари на Доналд Трамп на денешниот самит во Вашингтон – Би-би-си изброи дека Зеленски им рекол „благодарам“ на Трамп и на американската администрација шест пати во првите неколку минути додека зборувал.

Потпретседателот Џ.Д. Венс седеше спроти украинскиот претседател на софата.

Во февруари, Венс беше тој што го прекори што не им се заблагодарил доволно.

Зеленски денес посебно ѝ се заблагодари на Трамповата сопруга, Меланија.

Првата дама на САД, откри Зеленски, потпишала писмо адресирано до Владимир Путин, кое му било предадено во петокот.

Седејќи со Трамп во Овалната соба, Зеленски рече:

„Ви благодарам многу, господине претседателе. Прво, ви благодарам за поканата. Ви благодарам многу за вашите напори и личен ангажман за запирање на убиствата и завршување на оваа војна. Исто така, сакам да ја искористам оваа можност да ѝ се заблагодарам на вашата сопруга, првата дама на Соединетите Американски Држави. Таа потпиша писмо до Путин за нашите киднапирани деца.“

Трамп рече дека Украина ќе добие некаков вид безбедносна гаранција, но не прецизираше дали тоа ќе вклучува и американски војници.

Зборувајќи во Белата куќа, американскиот претседател рече:

„Ќе има многу помош во однос на безбедноста. Ќе има многу помош. Ќе биде добро. Тие се првата линија на одбрана затоа што се таму, но и ние ќе им помогнеме. Ќе бидеме вклучени кога ќе дојде време.“

Зеленски: Спремен сум за трилатерален состанок

Претседателите Зеленски и Трамп одговараа на прашања од новинарите во Белата куќа.

Запрашан за претходните изјави на двајцата лидери – во кои Зеленски рече дека од Русија зависи да ја заврши војната, а Трамп дека тоа зависи од Украина – американскиот претседател рече:

„Мислам дека ќе имаме состанок. Ако сè оди добро денес, ќе имаме трилатерален состанок и мислам дека постои разумна шанса тогаш да ја завршиме војната.“

Трамп се осврна на можна трилатерална средба меѓу него, Зеленски и Владимир Путин.

Тој додаде дека никогаш не може однапред да каже дали средбата ќе значи крај на војната, но ја искористи можноста повторно да го обвини Џо Бајден за неа.

Зеленски одговори дека е „подготвен за трилатерален состанок“ и додаде дека би било „многу добро“ да се одржи еден.

Доналд Трамп беше запрашан дали ги разбира „коренските причини“ за војната – фраза што често ја користи Владимир Путин.

„Војната ќе заврши. Овој господин сака да ја заврши, Владимир Путин сака да ја заврши, мислам дека целиот свет претрпе доста и ние ќе ја завршиме“, рече Трамп.

„Јас завршив шест војни“, тврдеше американскиот претседател.

„И мислев дека оваа можеби е најлесната. А не е – тешка е, има многу причини за тоа и ќе се зборува за неа долго време.“

Тој додаде: „Се чувствувам уверен дека ќе можеме да ја решиме.“

Зеленски: Нема да има избори додека трае војната

Кога новинарите го прашаа дали е спремен за одржување избори во Украина, претседателот Володимир Зеленски рече да, но нагласи дека тоа може да се случи само под безбедни околности.

„Затоа што не можете да одржувате избори за време на војна“, рече Зеленски, додавајќи дека прекинот на огнот можеби ќе биде неопходен.

Според него, тој би морал да ги опфати копното, морето и воздушниот простор за да се овозможат „демократски“ и „легални“ избори.

На тоа американскиот претседател Доналд Трамп одговори: „Значи, велите дека не можете да имате избори за време на војна?

„Според тоа, да речеме за три и пол години – значи, ако случајно бидеме во војна со некого, веќе нема избори?“

И Зеленски и Трамп се насмевнуваа додека си упаѓаа еден со друг во збор. Украинскиот претседател рече: „Дали ви се допаѓа таа идеја?“

Забелешката на Трамп се однесуваше на следниот изборен циклус во САД, во кој во моментов би му било законски забрането повторно да учествува.

Трамп беше прашан за безбедносните гаранции за Украина по мировниот договор.

Еден од новинарите го праша дали би се согласил да испрати американски сили како дел од „заштита слична на НАТО“ за да го убеди Володимир Зеленски да склучи договор.

„Во моментов имаме луѓе што чекаат во друга просторија. Сите се од Европа – најважните луѓе од Европа – и сакаат да обезбедат заштита. Тие многу се грижат за тоа и ние ќе им помогнеме да го сторат тоа. Мислам дека тоа е многу важно. Мислам дека е многу важно да се склучи договор“, рече Трамп.

Средбата на Доналд Трамп и Володимир Зеленски со новинарите заврши по нешто помалку од половина час.

На прашањето од новинарите дали Трамп сакал нешто повеќе од својот неодамнешен самит со Владимир Путин, американскиот претседател рече:

„Токму сега му кажав на претседателот… Токму сега индиректно разговарав со претседателот Путин и ние ќе имаме телефонски разговор веднаш по овие состаноци денес. Можеби ќе имаме трилатерален состанок – а можеби и не. Ако не го сториме тоа, борбите продолжуваат.

Ако го сториме тоа, мислам дека имаме добри шанси, мислам дека ако направиме трилатерален состанок, има добри шанси војната да заврши.

Но тој го очекува мојот повик штом ќе го завршиме овој состанок“, рече Трамп.

https://www.youtube.com/live/tTz6E_uCG6I?si=oe2BdoAl3GmOL-XH