Нема договор меѓу СОНК и МОН- медијацијата продолжува
Преговорите добро напредуваат но се уште нема договор.
Ова го соопшти лидерот на СОНК Јаким Неделков кој присуствуваше на третиот состанок помеѓу работните групи на синдикатот и МОН со посредникот. Колку брзо ќе се стави крај на спорот ќе зависи и од Министерството за финансии кое, како што кажа Неделков, пресметува дали може да се надмине последната владина понуда од 12% раст на платите.
„Доаѓаме до некакви заеднички ставови. Сепак има тука нијанси на размислување за дополнително зголемување на оние 12% меѓутоа кога и за колку, тоа се детали што се уште ги утврдуваме. За жал, министерот не може да излезе официјално со став бидејќи се уште ги нема точните информации од Министерството за финансии.- Јаким Неделков, претседател на СОНК.
Од партијата Левица преку соопштение посочуваат дека негувателки од градинки реагирале до нив дека Министерството за труд и социјала нема да им ги исплати дневниците за деновите кога штрајкуваа. Потврда за ова од министерството се уште нема, но Неделков вели дека овој потег може сериозно да ги наруши преговорите.
„Доставивме барање до МОН за исплата на дневници врз основа на колективен договор, имаме основ за таа работа и скоро сме сигурни дека ќе бидат исплатени во дејноста образование. За жал имаме проблем во труд и социјална политика. Може да биде сериозен проблем за нарушување на процесот на преговори.“-Јаким Неделков, претседател на СОНК.
Нова средба ќе има в недела кога практично истекуваат првите 10 дена предвидени со закон за да се реши спорот. Ако не се склучи спогодба и по дополнителниот законски рок, синдикатот планира да го реактивира штрајкот.
