Бесплатни, но неквалитетни сензори за дијабет – болните се жалат дека мораат приватни да купуваат 

Малата Јана Костадиновска има дијабет Тип 1. Сензорите кои државата им ги дава за мерење на гликемија во крвта се неквалитетни и траат по три дена, наместо две недели. Костадин Костадиновски татко на 11 годишното девојче вели дека поради тоа мора самите дополнително да ги набавуваат со што месечно ги чини и над 100 евра. Сензорите ги олеснуваат проблемите кои ги носи дијабетот, а така и полесно се контролира. Состојбата на децата може да се следи и преку смарт телефоните.

„Па еве го сензорот што ни е од државата, значи тие треба да траат 14 дена, нас ни траат по 3 дена по 4 дена. Трансмитерот го полниме и 3 дена трае, повеќе не ни траел сензор, а треба 14, ни даваат за 14 дена, значи 12 парчиња за 6 месеци кои ние фактички ги трошиме за две недели.  Приватно што си ги купуваме, тие си тераат. Има убави сензори по 50 евра и тие си тераат точно 14 дена“, вели Костадин Костадиновски.

Таткото на Јана вели дека дијабетесот кај неговата ќерка случајно го откриле и оттогаш почнале грижите и непроспиените ноќи. Малата Јана храбро се справува со болеста и вели дека не и тешко, но најмногу и недостасува да јаде благо. Таа сега е 5-то одделение, вели и на училиште нема некакви проблеми со другарчињата.

„Немам, никој не ме навредува и си терам како порано. Малку ми е потешко, да, ми се јаде малку благо, но пак си поткаснувам“,, вели Јана Костадиновска.

Од Сојузот на здруженијата на дијабетичари денеска кај Школка во Градскиот парк беше организиран едукативен настан, но и можност лицата да си го измерат шеќерот.  Димче Велев, претседател на Сојузот на дијабетичарите вели дека во регионот Македонија е на најниски гранки во однос на грижата на државата за болните со дијабетес.  Бараат набавката на сензорите но и другите помагала како на пример ленти и глукомери да се набавуваат на отворен пазар а не на тендер.

„Нашето барање генерално и главната цел на сето делување е сите Тип 1 да добијат сензори, Тип 2 да добијат сите и нова терапија. Ние на позитивната листа, цело време кажуваме добиваме само два лека, другите сите си ги купуваме приватно веќе 7-ма година. Позитивната листа, доколку се смени по нивните критериуми, државата што ги објави ние ќе имаме уште 7 или 8 лекови кои што сега ги купуваме, треба да ги купуваме преку Фондот“, вели Димче Велев.

Сензорите почнаа да се даваат во ноември минатата година и засега со нив се опфатени деца и млади лица до 18 години со дијабетес Тип 1, како и за бремените и оние кои имаат потешки болести.