Снегот предизвика проблеми во сообраќајот, забрана за камиони на неколку патни правци
За следните денови, синоптичарите најавуваат стабилно време, со ниски утрински температури, а дневните ќе бидат во пораст, освен по одделни котлини каде ќе има појава на магла.
Врнежите од снег предизвикаа проблеми во сообраќајот. Забрана за тешки товарни возила е воведена на неколку патни правци низ државата, а Центарот за управување со кризи издаде вонредна информација за сите оние кои се наоѓаат во Берово да не тргнуваат на пат поради обилни врнежи од снег.
Од 10 часот, според информациите од Авто мото сојузот на Македонија и јавното претпријатие „Македонија пат“ воведена е забрана за движење на сите видови моторни возила на патен правец Берово – Беровско Езеро, поради обилни врнежи снег.
Од Центарот за управување со кризи апелираа до сите лица кои моментно се наоѓаат кај Беровско Езеро – да не тргнуваат на пат, а ако имаат потреба од храна и лекови, да се јават на 112 во ЦУК, по што од Општина Берово ќе им биде доставено што им е потребно.
Регионалните центри за управување со кризи во Берово и во Штип, во координативна оперативна комуникација преку Секторот за операции и координација, соопштија дека во целосен прекин е патот Берово-Струмица поради врнежи од снег и паднати дрвја по патот.
Забрани за тешки товарни возила има и на патните правци на крак Маврово – Маврови Анови и Двориште – Струмица – Берово. И на патниот правец Тетово – Попова Шапка, односно на потегот од село Лисец кон Попова Шапка, воведена е забрана за автобуси и тешки товарни возила, додека за останатите возила задолжителна е употребата на зимска опрема (ланци).
Од АМСМ информираа дека сообраќајот на останатите државни патишта се одвива во зимски услови, по влажни коловози. Интензитетот на сообраќај на патните правци надвор од градските средини е умерен, а на граничните премини од македонска страна, нема подолги задржувања за влез и излез од државата.
За следните денови, синоптичарите најавуваат стабилно време, со ниски утрински температури, а дневните ќе бидат во пораст, освен по одделни котлини каде ќе има појава на магла.
