29-години од смртта на принцезата Дијана
На денешен ден пред 29 години, светот беше потресен од веста за трагичната смрт на принцезата Дијана – една од најсаканите и највлијателни личности на британското кралско семејство. Нејзината смрт одекна ширум светот, оставајќи милиони луѓе во неверување и тага. За многумина, Дијана не беше само принцеза, туку „кралицата на срцата“, жена која со својата човечност и блискост ја освои јавноста.
Принцезата Дијана почина во Париз, неколку часа откако автомобилот во кој се наоѓаше доживеа страшна несреќа во тунелот „Пон де л’Алма“.
На последниот ден од август 1997 година, автомобилот со Дијана, нејзиниот партнер Доди ал Фајед и возачот Анри Пол удрил во тунелот. Доди и Пол загинале на местото, додека телохранителот Тревор Рис-Џонс бил тешко повреден.
Меѓу првите што пристигнале на местото бил францускиот пожарникар Ксавие Гурмелон. Тој ја затекнал Дијана жива и свесна, со отежнато дишење. Ја држел за рака и се обидувал да ја смири, верувајќи дека ќе преживее.
„Мој Боже, што се случи?“ биле, според неговото сведоштво, последните зборови на принцезата.
Дури подоцна спасувачите сфатиле дека повредената жена е принцезата од Велс. Таа била пренесена во болницата „Пити-Салпетриер“, каде што починала околу еден час по несреќата.
И по речиси три децении, нејзината смрт останува една од најпотресните трагедии што го одбележаа крајот на 20 век.
Иако околностите на трагедијата со години поттикнуваат бројни шпекулации и теории на заговор, официјалните истраги несреќата ја поврзаа со високата брзина, алкохолот и губењето контрола над возилото.
