Шпанската влада прогласи вонредна состојба: Шумските пожари им се закануваат на населбите во близина на Мадрид и во покраината Авила

Шпанската влада прогласи вонредна состојба во земјата во четвртокот вечерта откако серија шумски пожари им се заканија на населбите во близина на Мадрид и во соседната покраина Авила, принудувајќи евакуација на повеќе од 10.000 луѓе додека пожарникарите се обидуваа да ги стават пожарите под контрола, објави денес новинската агенција Ројтерс.

Министерството за внатрешни работи соопшти дека одлуката е донесена поради истовременото избувнување на повеќе пожари, неповолните временски услови и потребата од ангажирање на големи ресурси од различни органи на јавната администрација, што дополнително го комплицира гаснењето на пожарите и спроведувањето на мерките за цивилна заштита.

Шпанија и поголемиот дел од јужна Европа се соочуваат со сè потешки сезони на шумски пожари, кои научниците ги поврзуваат со климатските промени. Експертите велат дека бујната вегетација, која порасна по невообичаено обилните пролетни врнежи, пресушила за време на екстремните летни горештини и на тој начин станала гориво за брзото ширење на пожарите.

Регионалната влада на Мадрид апелираше за помош, опишувајќи ја ситуацијата како „исклучително сериозна“. Таа рече дека активните пожари во градовите Вилја дел Прадо, Сан Мартин де Валдеиглесијас и Алморокс, во соседната Кастиља-Ла Манча, имаат потенцијал да се шират побрзо отколку што може да ги контролира моменталниот капацитет за гаснење пожари. Исто така, предупреди дека пожарот во Бургохондо, во Авила, би можел да стигне до областа на Мадрид во наредните часови поради временските услови.

Според регионалната влада, повеќе од 10.000 луѓе биле евакуирани од градовите Вилја дел Прадо, Сан Мартин де Валдеиглесијас, Пелајос де ла Преса и Алдеа дел Фресно.

Според шпанскиот закон за Националниот систем за цивилна заштита, прогласувањето вонредна состојба го става управувањето со кризи под директна надлежност на министерот за внатрешни работи, кој е одговорен за координирање на одговорот. Властите соопштија дека ова е првпат да се донесе таква одлука за шумски пожар.

Повеќе од 270 лица од службите за итни случаи и 40 копнени единици се распоредени во погодените области, заедно со неколку контингенти од Воената единица за итни интервенции.

Во Шпанија, од почетокот на годината изгореле повеќе од 100.000 хектари, што приближно одговара на просечната годишна површина на земјиште изгорено во земјата во текот на претходната деценија. Тринаесет лица загинаа, што ја прави 2026 година една од најсмртоносните сезони на шумски пожари во последните децении.