СТРЕЛКИТЕ НА ЧАСОВНИКОТ ГИ ВРАЌАМЕ НАЗАД, ПОЧНУВА ЗИМСКОТО СМЕТАЊЕ
И покрај најавите дека поради заштеда на струја може да се одложи преминот кон зимско сметање на времето, сепак во недела ќе ги поместиме стрелките на часовникот еден час наназад.
Летното сметање на времето во 2022 година завршува во недела, на 30 октомври во 03:00 часот, така што со поместување еден час наназад, времето во 03:00 часот се смета како 02:00 часот.
До почетокот на епидемијата на корона вирусот имаше неколку дискусии за укинување на поместувањето на стрелките, а пред четири години и ЕУ беше многу блиску до тоа. Набрзо беше изгласано дека треба да биде така, а земјите-членки на ЕУ добија рок да се изјаснат до април 2020 година. Меѓутоа, како што беше прогласена пандемија во март, борбата против вирусот стана приоритет, додека летното и зимското сметање на времето останаа на маргините.
Со промената на времето секој чувствува психофизички промени. Лицата со хронични заболувања потешко ќе се справат со временската смена, поради што е неопходно да се придржуваат до терапијата и доколку сметаат дека е неопходно да се консултираат со лекар.
