Осумте пациенти со цистична фиброза во наредните денови ќе ја почнат терапијата со „Трикафта“
Министерот за здравство Фатмир Меџити на денешната прес-конференција информираше дека утрово на Клиниката за детски болести пристигна долгоочекуваниот лек „Трикафта“ наменет за пациентите кои боледуваат од цистична фиброза. Лекот е набавен само за осум пациенти кои се во најкритична состојба.
Во соработка со сите надлежни институти го решивме најголемото прашање за оваа категорија пациенти. Очекуваме дека со оваа терапија значително ќе се подобри квалитетот на животот на пациентите со цистична фиброза. Пациентите се во фокусот на нашата работа и продолжуваме со нашите заложби, изјави Меџити.
Д-р Стојка Фуштиќ, директорката на Клиниката за детски болести за го појасни процесот на којшто ќе се дава лекот „Трикафта“. Таа посочи дека веќе се примаат пациентите кои треба да започнат терапија. На Клиниката ќе бидат примени шест пациенти, а другите двајца ќе ја примат терапијата на Универзитетската клиника за пулмологија.
Очекуваме да започнеме од утре или наредните денови. Очекуваме позитивен ефект од терапијата во однос на подобрување на нивната белодробна функција, подобрување на квалитетот на животот, намалена зачестеност на хоспитализација и секако поактивен живот на овие пациенти, додава таа.
Соопшти дека овие осум пациенти, двајца се во навистина критична состојба. Седум од нив се возрасни, а едно е дете. Терапијата е таблетарна, за цела година и се дава еднаш месечно.
Информацијата вчера прв ја потврди претседателот на асоцијацијата на овие пациенти, Фики Гаспар.
Тој за МИА изјави дека лекот пристигнал во земјава во понеделникот, но дека сѐ уште не е дистрибуиран до Клиниката, бидејќи се чекаат да завршат административните процедури.
Претходно, Владата соопшти дека се обезбедени 2,2 милиони евра од буџетот за набавка на „Трикафта“ за најитните пациенти, откако почина Благојче Илиевски, пациент кој две години се бореше да издејствува лекот да биде донесен кај нас.
Добавувачот на лекот има обезбедено количини за најкритичните пациенти и тие доаѓаат согласно динамиката што производителот ја кажува, зашто не се работи за лекови кои ги има на залиха, туку се произведуваат по барање и нарачка за точен број пациенти.
Пред еден месец, Асоцијацијата за цистична фиброза организираше протест пред Владата, револтирани од односот на државата од која со години го бараат лекот „трикафта“ за нивната болест.
„Жално е во 21 век кога има лек за оваа болест да умираат пациентите со цистична фиброза. Многу сме револтирани од предолгото чекање и одлучување дали да се донесе лекот и за колку пациенти. Нема веќе време за чекање“, рече тогаш Ирена Василевска, мајка на дете болно од цистична фиброза.
