На иницијативата за референдум најпрво ќе се потпише раководството на ВМРО-ДПМНЕ
„ВМРО-ДПМНЕ вечер од 18 часот ќе има седница на Извршниот комитет за носење одлука за предлогот за референдумско изјаснување во врска со Преговарачката рамка и уставните измени побарани од Бугарија за да отпочнат преговорите на нашата земја со ЕУ. На иницијативата први потпишани ќе бидат членовите на раководството на ВМРО-ДПМНЕ“, изјави Марија Митева, портпаролка на партијата и повтори дека за ВМРО-ДПМНЕ не се спорни евроинтегративните аспирации, туку идентитетските негирања од страна на Бугарија.
„Размислувањата во ВМРО-ДПМНЕ, за кои ќе се дискутира на вечерашниот Извршен комитет, се на референдумот да се побара престанок на важноста на овој договор со кој ќе се постават фундаментите за бугаризација и обезличување на Македонија. До таквиот референдум би се дошло преку собирање граѓански потписи, а на иницијативата први потпишани ќе биде раководството на ВМРО-ДПМНЕ. По собирањето на квалификуваните најмалку потребни 100 потписи, ќе пристапи кон собирање на 150 илјади потписи од граѓаните“, рече Митева одговарајќи на новинарско прашање на прес-конференција во ВМРО-ДПМНЕ.
Додаде дека пречка за ВМРО-ДПМНЕ е членот 5 од Преговарачка рамка, кој се потпира на протоколот кој, пак, како што рече, ги содржи сите спорни делови од Договорот за пријателство, добрососедство, и соработка од 2017 година.
„Оттука, изворот и коренот на проблемите се наоѓа токму во овој договор кој поставува фундамент на бугарските позиции од кој подоцна произлегува и преговарачката рамка и членот 5. Мора да потенцираме дека ВМРО-ДПМНЕ не ги спори и ги поддржува аспирациите за интегрирање на Македонија во ЕУ, но она што е неприфатливо за бугарските барања, тоа е промената на историјата, идентитетот, јазикот и културата“, рече Митева.
Посочи дека претседателот на партијата Христијан Мицкоски отворил процес на широки консултации – биле консултирани внатрешните органи на партијата, повеќе професори и експерти по уставно право, академската јавност и коалициските партии и дека добил поддршка за иницијативата.
„Како гаранција дека уставните измени нема да се случат остануваат пратениците на ВМРО-ДПМНЕ и коалицијата“, додаде Митева
