Вработените од Министерството за култура преку протест го изразија незадоволството од малите плати

Владата да не дозволи нерамноправен третман на вработените во државните органи, порачаа вработените од Министерството за култура, Управата за заштита на културното наследство и Агенцијата за филм која денеска изрази незадоволство поради месечните примања.

Вработениет се незадоволни од тоа што платите на речиси 70 отсто на вработените во овие три институции се под просечната плата во државата, а разликата со платите на вработените на исти позиции во установите од областа на културата е и по 10 илјади денари.

Претседателот на Синдикалната организација при Министерството за култура на УПОЗ, Бранко Костовски, на денешниот протест апелираше дека веќе е изготвен Предлог-текст на колективниот договор што предвидува објективно и коректно покачување на платите на вработените, за кој минатата година Министерството за финансии даде негативно мислење.

Но по само неколку дена, како што напомена, со Законот за буџетите се утврди зголемување на платите од 30 отсто за вработените во Министерството за финансии.

Ние го поздравуваме зголемувањето на платите на нашите колеги од Министерството за финансии, но истовремено бараме од министерот за финансии, Владата и премиерот да не дозволат нерамноправен третман на вработените во државните органи. Ги охрабруваме и нашите колеги во другите министерства да ни се придружат и заеднички да се избориме за она што ни следува. Ние имаме поддршка од раководството, од одговорните лица во Министерството за култура и ќе продолжиме по институционален пат да бараме покачување на платите, рече Костовски.

Тој додаде дека државната администрација не смее и не треба да се потценува со никакви квалификации, туку нејзината работа треба да биде признаена и вреднувана.