Уредник во „Гугл“ открива што луѓето најмногу пребаруваат кога мислат дека никој не гледа

Новинарот и уредник за податоци во „Гугл“, Сајмон Роџерс, напишал текст во кој преку анализа на глобалните интернет-пребарувања се обидува да покаже што луѓето навистина размислуваат и прашуваат кога немаат публика и не се обидуваат да се претстават во најдобро светло, пишуваСи-ен-би-си.

Во текстот, Роџерс издвојува три групи прашања што најчесто се појавуваат во глобалните трендови и кои, според него, откриваат многу за современиот човек: секојдневни основни вештини, барање значајна работа и желбата да им се помогне на другите.

„Како уредник за податоци во ‘Гугл’, секојдневно работам со најголемата јавно достапна база на податоци. За мене, тоа е ‘мозокот на светот’ претставен преку податоци. Тој дава единствен поглед во тоа што луѓето размислувале во последните две децении“, вели Роџерс.

„Податоците се неверојатно искрени. Начинот на кој колективно пребаруваме едноставно не е ист како начинот на кој се претставуваме на социјалните мрежи. Не постои „глупаво прашање“, а анализата на овие огромни трендови ни дава многу точна слика за нашите заеднички љубопитности“.

Кога се анализираат трилиони пребарувања годишно, се појавуваат неверојатни обрасци. Еве три од најоткривачките прашања што луѓето ги поставуваат — и што тие откриваат за тоа кои навистина сме.

„Како да се свари јајце“ (и други основни животни вештини)

Ако ги погледнете најчесто поставуваните прашања на сите времиња, би очекувале сложени филозофски прашања. Иако „Што е љубов?“ навистина е меѓу првите десет, листата е претежно исполнета со секојдневни прашања. „Како да се свари јајце“ постојано е едно од најпребаруваните „како да…“ прашања поврзани со храна во светот. Исто така често се пребаруваат работи како „како да се поправи тоалет“ или „како да се поправи врата“.

Лесно е да се заклучи дека ги губиме основните животни вештини или дека забораваме едноставни задачи за возрасни. Но овие прашања исто така изгледаат како невина љубопитност, дури и кога доаѓаат од возрасни луѓе. Во овие податоци се крие и многу надежна човечка особина. Пребарувањето ни дава место без осудување каде што можеме да признаеме што не знаеме. Фактот дека милиони луѓе ги пишуваат овие едноставни прашања значи дека, дури и кога не знаеме ништо, ние сме подготвени да учиме и да се подобруваме.

„Работа што им помага на луѓето“

Начинот на кој ги гледаме нашите кариери драматично се промени во последните години, а податоците од трендовите на Гугл тоа јасно го потврдуваат. Луѓето сè почесто бараат насоки за професионални предизвици, поставувајќи прашања како „како да побарам покачување“, „како да побарам повратна информација“ или „како да побарам препорака за работа“.

Долги години, меѓу најпопуларните кариерни пребарувања било „работи што добро се платени“.

Но има силни докази дека по пандемијата луѓето бараат поисполнителни патишта. Во последно време се забележува промена: пребарувањата за „работа што им помага на луѓето“ ги надминале пребарувањата за „работа што добро се плаќа“. Најчесто барани професии во оваа категорија се терапевт, социјален работник и психолог.

„Како да се помогне…“

Често слушаме дека интернетот ги истакнува најсебичните, најподелените или најлутите човечки импулси. Но податоците за пребарување го покажуваат спротивното. Пребарувањата „како да се помогне…“ се на историски највисоко ниво. Во Соединетите Американски Држави и Обединетото Кралство, најчестото прашање во оваа категорија во последната деценија е „како да се помогне на некој со депресија“, веднаш следено од анксиозност и напади на паника.

Ова потсетува дека, иако пребарувањето е само почеток, често е потребна професионална медицинска или психолошка помош кога некој се соочува со проблеми. Кога гледаме дека некој страда, нашиот прв инстинкт најчесто е да помогнеме — само не знаеме секогаш како да започнеме. Без разлика дали се работи за глобална криза или пријател во тешка ситуација, се свртуваме кон интернетот за совет како да бидеме присутни за другите.

Сајмон Роџерс е автор на книгата „Што прашуваме на Гугл: изненадувачки надежна слика за човештвото“. Како уредник за податоци во Гугл, тој раководи тим од новинари за податоци, аналитичари и визуелизатори кои раскажуваат приказни. Претходно бил прв уредник за податоци во Твитер, а е автор и на „Фактите се свети“.