Уапсени двајца од крадците кои го ограбија Лувр 

Двајца осомничени беа уапсени во сабота навечер како дел од истрагата за голема кражба во Лувр. Според „Ле Паризиен“, двајцата мажи се по потекло од североисточните предградија на Париз, и се дел од четиричлена банда која користела товарен лифт за да стигне до првиот кат во недела наутро, пробил прозорец од балкон, влегол во галеријата Аполо, скршил две витрини што содржеле дел од колекцијата на француски кралски накит и украл накит вреден 88 милиони евра, пред да го симнат товарниот лифт и да избегаат со два скутери.

Операцијата во сабота навечер беше започната брзо откако истражителите дознаа дека еден од осомничените ќе избега во странство, веројатно во Алжир.

Според „Ле Паризиен“, тој бил уапсен на аеродромот Шарл де Гол додека се спремал да се качи на авион. Кратко потоа, втор осомничен бил уапсен во регионот на Париз.

Двајцата мажи, кои веќе ѝ се познати на полицијата по кражби, се искусни крадци кои можеби работат по нарачка. Се очекува да бидат задржани 96 часа. Истрагата продолжува за да се идентификуваат преостанатите соучесници.

И поради невидениот безбедносен пропуст што доведе до грабежот на векот минатата недела, некои од најскапоцените скапоцености беа префрлени од познатиот музеј во Банката на Франција.

Пренесувањето на предметите од галеријата Аполо беше извршено во петокот под придружба на тајна полиција, објави француската телевизија RTL, повикувајќи се на неименувани извори.