Активни девет пожари на отворен простор, четири ставени под контрола

Во државата до 13 часот се регистрирани вкупно 16 пожари на отворен простор, од кои девет се активни, четири се ставени под контрола, а три се изгаснати, информира Центарот за управување со кризи (ЦУК).

Според податоците на ЦУК, активни се пожарите на потегот меѓу селата Буринец, Локов, Селце и Елевци во Општина Струга, кај селото Белица во Општина Македонски Брод, кај селото Бенче во истата општина, како и во атарот на селото Кнежино на месноста Црн Камен во Кичевско.

Активни пожари има и кај селото Гајре во Тетовско, во атарот на селото Палатица во Општина Желино, како и кај селата Печково и Падалиште во Гостиварско и кај селото Долгаец во Општина Долнени.

Под контрола се ставени пожарите кај селото Тајмиште во Кичевско, кај селото Копаница во Општина Сарај, на градската депонија во Делчево и кај селото Брест на месноста Рамно во Општина Чучер-Сандево.

Во текот на денешниот ден изгаснати се три пожари, и тоа кај селото Ситник во Општина Ново Село, во близина на Новите гробишта во Прилеп и кај Градските гробишта во Крушево.