Трамп ги зголемува царините за 60 земји

Од денес, американската администрација воведува царини од десет и 12,5 проценти за стоки од 60 трговски партнери, вклучувајќи ја и Европската Унија, поради недоволно строга примена на забраната за принудна работа.

Канцеларијата на американскиот трговски претставник објави дека новите царини од 10 до 12,5 проценти ќе стапат на сила во петок во 00:01 часот. Мерките ќе опфатат десетици трговски партнери, од Европа и Кина до Индија. Овој потег се совпаѓа со истекот на претходната, општа царина од 10 проценти што администрацијата на Трамп ја воведе претходно оваа година откако изгуби судски спор.

„Претседателот нема да дозволи неговата трговска политика и целокупните цели да бидат поткопани само затоа што суд или некој друг ограничил една од алатките“, изјавија високи претставници на Белата куќа за новинарите на телефонски брифинг за новите мерки.

Незадоволство од зголемувањето на царините изразија Австралија и Бразил.

Австралија изјави дека новите американски царини немаат смисла и изрази разочарување од одлуката според која царините за австралиските стоки ќе се зголемат од десет на 12,5 проценти. „Според нас, навистина нема смисла“, изјави австралискиот министер за одбрана Ричард Марлес за Еј-би-си радио.

Австралискиот министер за трговија Дон Фарел ги нарече новите американски царини „целосно неоправдани“ и најави дека ќе продолжи да врши притисок врз американските трговски претставници да ги укинат сите царини за австралиските стоки.

Царините што ги воведоа САД за Бразил и 59 други трговски партнери беа отфрлени од бразилската влада, опишувајќи ги како целосно произволни и неоправдани. „Без правна основа во домашното законодавство за поддршка на својата протекционистичка трговска политика, Канцеларијата на трговскиот претставник на САД одлучи да манипулира со прашање од големо значење за човековите права и движењето за права на работниците“, се вели во соопштението на Бразил.

Според новата мерка, бразилскиот извоз во Соединетите Американски Држави ќе биде оданочен со стапка од 12,5 проценти почнувајќи од петок. Бразил соопшти дека веднаш ќе покрене постапка за активирање на механизмите за одговор предвидени во неговиот „Закон за реципроцитет“ и ќе го изнесе случајот пред механизмот за решавање на спорови на Светската трговска организација.

Овој потег е најновиот обид на Белата куќа да ја оживее визијата на претседателот Доналд Трамп од предизборната кампања за речиси универзални тарифи. Врховниот суд на САД во февруари ги поништи неговите „реципрочни“ тарифи во опсег од десет до 50 проценти, кои беа воведени според законот за вонредна состојба заради намалување на американскиот трговски дефицит.