Сѐ е договорено: Јирген Клоп ќе биде селектор на Германија до 2030 година

Јирген Клоп ќе биде нов селектор на германската репрезентација, пренесуваат водечките германски медиуми. Според информациите, конечниот договор меѓу трофејниот стратег и Фудбалската федерација на Германија бил постигнат синоќа во Њујорк.

Наводно, Клоп потпишал договор со важност до завршувањето на Светското првенство во 2030 година, со што започнува ново поглавје во својата богата тренерска кариера.

Поранешниот тренер на Мајнц, Борусија Дортмунд и Ливерпул важи за еден од најуспешните германски стратези во модерниот фудбал. Со своите резултати на клупско ниво со години беше меѓу најбараните тренери во Европа, а неговото преземање на германската репрезентација долго време беше предмет на бројни шпекулации.

Според последните информации, сите детали се договорени и останува само официјалната промоција. Договорот до 2030 година покажува дека двете страни имаат долгорочен план за враќање на Германија во самиот светски врв.

Во Германската фудбалска федерација веруваат дека токму Клоп е човекот кој може повторно да создаде репрезентација способна да се бори за најголемите трофеи. Неговиот препознатлив стил на игра, огромната енергија и лидерските квалитети се очекува да внесат нов импулс во националниот тим.

Официјалната потврда на назначувањето се очекува во наредните денови, иако најрелевантните германски извори веќе тврдат дека договорот е комплетно финализиран.

Доколку не се случи неочекуван пресврт, Јирген Клоп ќе ја предводи Германија најмалку до крајот на Светското првенство во 2030 година.