Народната банка ја презеде контролата врз Алта банка Битола, граѓаните ќе можат да плаќаат со картички до 10.000 денари неделно

Народната банка  воведе привремена администрација во „Алта банка“ АД Битола и го презеде управувањето со банката. Одлуката е донесена денеска, 1 ноември, а ја соопшти гувернерот Трајко Славески на вонредната прес-конференција.

Со воведувањето на привремената администрација, управувањето со имотот и работењето на банката преминува во надлежност на администратори назначени од Народната банка. Мерката е временска и, според Славески, има цел да го заштити имотот на банката и интересите на штедачите.

Една од најважните промени за клиентите е ограничувањето на плаќањата. За физичките лица е определен неделен лимит од 10.000 денари за одлив од сметките преку платежните картички издадени од банката. Тоа значи дека граѓаните ќе можат да ги користат картичките за плаќања до овој износ во текот на една недела.

Истовремено, интерните трансфери меѓу сметките на клиентите во рамките на „Алта банка“, како за физичките, така и за правните лица, остануваат неограничени.

Славески информираше дека до вчера од банката биле повлечени околу два милиони евра. Тој нагласи дека воведувањето администрација не е резултат на нарушена финансиска состојба на банката во Битола. Според неговото образложение, банката е ликвидна, високо капитализирана, има солиден квалитет на кредитното портфолио и ги исполнува супервизорските стандарди.

Одлуката следува по случувањата со „Алта банка“ АД Белград, на која Народната банка на Србија ѝ ја одзеде дозволата за работа. Српската банка е акционер со квалификувано учество во „Алта банка“ АД Битола, што беше причина македонскиот регулатор да преземе мерки за заштита на домашната банка.

Гувернерот упати апел до јавноста да не се шират непроверени информации кои можат да предизвикаат дополнителна загриженост кај граѓаните. Воедно, ги потсети клиентите кои имаат кредити во банката дека треба редовно да ги подмируваат своите обврски и дека воведувањето администрација не ги ослободува од договорните обврски.

На пресконференцијата беше соопштено дека Народната банка ќе продолжи да ја следи состојбата и да постапува во рамките на своите законски надлежности. Засега не е соопштен точниот рок на траење на привремената администрација, ниту до кога ќе важи ограничувањето за плаќањата со картички.