Илон Маск: Благодарение на роботите и АИ за 20 години повеќето луѓе нема да мора да работат

Технолошкиот милијардер Илон Маск денес изјави дека вештачката интелигенција и хуманоидната роботика драматично ќе го преобликуваат глобалното општество, предвидувајќи иднина каде што сиромаштијата ќе биде елиминирана, а работата ќе стане опционална.

„Вештачката интелигенција и хуманоидните роботи всушност ќе ја елиминираат сиромаштијата“, кажа Маск на Инвестицискиот форум САД-Саудиска Арабија во Вашингтон.

Маск, кој раководи со повеќе компании, вклучувајќи го производителот на електрични автомобили Тесла, производителот на ракети Спејсекс и стартапот за вештачка интелигенција иксАИ, кажа дека општеството треба да се подготви за структурни промени со напредувањето на технологијата. Тој предвиде дека на „долгорочен рок“, кој го дефинираше како 10 до 20 години, традиционалната работа ќе стане непотребна за повеќето луѓе.

„Моето предвидување е дека работата ќе биде опционална“, кажа тој. „Ќе биде како да се игра спорт или да се игра видео игри… можете да одите во продавница и да купите зеленчук или можете да го одгледувате во вашиот двор. Многу е потешко, но некои луѓе сè уште го прават тоа затоа што сакаат да одгледуваат зеленчук. Таквата работа ќе биде – опционална“.