Докторка откри кои навики треба да се усвојат за одржливо губење на килограми: Тајната е во ова

Одржливото намалување на телесната тежина не се заснова на брзи решенија ниту на екстремни диети, туку на навики што можат долгорочно да се одржуваат.

Лекарката и истражувач во областа на медицината за дебелина, Холи Вајат, која има повеќе од 27 години искуство, истакнува дека екстремните пристапи можат да донесат краткорочни резултати, но тешко е тие да се задржат.

„Често им велам на пациентите дека ако постојано им е потребен одмор од нивниот начин на живот, тогаш веројатно немаат начин на живот што ќе функционира долгорочно“, рече Вајат.

Треба да се разликува фазата на слабеење од фазата на одржување

Една од најважните работи е да се прави разлика меѓу фазата на слабеење и фазата на одржување на телесната тежина.

„Слабеењето и одржувањето на телесната тежина се два многу различни процеси, и биолошки и во однесувањето“, објаснува Вајат. Со други зборови, она што ви помага да ослабете не мора да биде истото што ќе ви помогне и да ја задржите новата тежина.

Во фазата на слабеење целта е да се создаде умерен калориски дефицит, со намалување на внесувањето калории, поголема потрошувачка преку физичка активност или со комбинација од овие два пристапа. Сепак, стручњаците советуваат акцентот најпрво да се стави на исхраната, без екстремни ограничувања. Дополнителното движење притоа може да помогне во зачувувањето на мускулната маса.

Кога ќе настапи фазата на одржување, фокусот се менува. Тогаш е важно да се пронајде рамнотежа меѓу исхраната и физичката активност.

„Целта е да им се помогне на луѓето да живеат во енергетска рамнотежа на одржлив начин“, вели Вајат. Доследноста е поважна од интензитетот, па затоа е најдобро да се избере активност во која уживате, како што се пешачење, пливање или танцување.

Се препорачуваат најмалку 150 минути умерена физичка активност неделно, а истражувањата покажуваат дека луѓето кои се приближуваат до 250 минути неделно се поуспешни во долгорочното одржување на телесната тежина.

Важен е начинот на размислување

Начинот на размислување е исто така важен. Вајат нагласува дека одржувањето на тежината не е само прашање на исхрана и вежбање, туку и на идентитет. Ако почнете да се гледате себеси како личност која им дава приоритет на здравјето, вежбањето и урамнотежената исхрана, поголема е веројатноста дека овие навики ќе станат дел од вашиот секојдневен живот. Поддршката од околината исто така помага.

„Ги охрабрувам луѓето да не влегуваат во тоа сами“, вели Вајат. Луѓето полесно истрајуваат низ промените кога се опкружени со оние кои ги поддржуваат, се движат и го ставаат здравјето на прво место. Тоа може да биде пријател со кого пешачите, член на семејството со кого подготвувате оброци или онлајн заедница што ве мотивира.

Заклучокот е едноставен: не ви се потребни екстремни мерки за трајно губење на тежината. Клучот е умерен калориски дефицит, редовно вежбање, промена во начинот на размислување и поддршка од луѓето околу вас.