Данска сака да забрани лажни слики генерирани со вештачка интелигенција: забрането споделување без согласност

Данската влада предлага закон со кој би се забранило креирањето и споделувањето на дигитално изменети прикази на поединци без нивна согласност.

Министерката за култура, Зенија Стампе, денес треба да претстави нацрт-закон чија цел е да се спречи ширењето на таканаречената „дипфејк“ содржина, создадена со помош на вештачка интелигенција, пренесува Ројтерс.

Во својата изјава, таа објасни дека манипулираните видеа и слики можат да шират дезинформации и да ја поткопаат јавната доверба во автентичноста на дигиталните материјали.

„Една од клучните цели на законот е да ги обврзе технолошките гиганти брзо да ја отстрануваат таквата содржина со цел да се минимизира штетата“, рече таа.

Законот е дизајниран да ја заштити пошироката јавност, како и уметниците, чии дела и настапи не смеат да бидат имитирани и дистрибуирани без дозвола.

Сепак, предлогот вклучува исклучоци за дела како што се карикатури, пародии и сатира, како и за други форми на општествена и политичка критика.

Предлог-законот сега минува низ парламентарната процедура. Министерката Стампе изрази надеж дека тој би можел да стапи на сила на почетокот на следната година.