Волстрит џурнал: Канада сака да стане „придружна членка“ на Европската Унија
Канадскиот премиер Марк Карни сака да воспостави поблиски врски со Европската Унија и ја разгледува можноста неговата земја да стане „придружна членка“ на Унијата, објави Волстрит џурнал.
Европската Унија, која досега беше прилично строга во однос на правилата за членство, е отворена за идејата на Канада да ѝ се додели нов статус на придружно членство, кој во моментов не постои, пишува весникот, повикувајќи се на неименувани претставници од ЕУ и Канада.
Канадската амбасада во Брисел и претставниците на Европската комисија не одговориле на барањата за коментар.
Трговската војна меѓу Канада и Соединетите Држави, која станува сè поостра, дополнително ја забрза стратегиската ориентација на Отава кон други трговски партнери.
Односите на Канада со Вашингтон нагло се влошија откако американскиот претседател Доналд Трамп се врати во Белата куќа во почетокот на 2025 година, поради несогласувањата околу трговијата и други прашања. Трговскиот спор доведе до воведување царини за прекугранична трговија вредна десетици милијарди долари.
Канада и ЕУ разговараат за начини што би овозможиле канадските стоки, услуги и работници вклучени во стратегиските синџири на снабдување, како што се енергетиката, вештачката интелигенција, одбраната и критичните минерали, слободно да се движат меѓу Канада и Унијата.
Волстрит џурнал наведува дека тоа практично би значело поместување на економската граница на ЕУ до Канада.
Двете страни разговараат и за поставување подводни кабли, заедничка изградба на центри за податоци, складирање податоци во облак, нови сателитски мрежи, како и инфраструктура преку која канадските енергенси би се испорачувале во Европската Унија.
Карни редовно разговара со неколку европски лидери, а особено со францускиот претседател Емануел Макрон, за можноста на Канаѓаните да им се овозможи да живеат и работат во ЕУ без визи, наведува Волстрит џурнал, повикувајќи се на двајца извори запознаени со разговорите.
Карни и Макрон треба повторно да се сретнат подоцна овој месец.
Сепак, планот за многу потесно поврзување на Канада со Европската Унија нема лесно да се реализира. На тоа укажуваат и проблемите со значително помалку амбициозниот трговски договор меѓу Канада и ЕУ.
Повеќе од една деценија откако договорот беше постигнат и девет години откако почна привремено да се применува, неколку земји членки на ЕУ сè уште го немаат ратификувано.
