УКРАИНЦИТЕ БЕА СПРЕМНИ, АМЕРИКАНЦИТЕ РЕКОА „САМО ХЕРСОН“ Си-Ен-Ен пишува за големата офанзива и за „воените игри“ 

САД водат рутински воен дијалог на повеќе нивоа со Украина. Нема да коментираме за спецификите на тие ангажмани. Генерално, им даваме информации на Украинците за да им помогнеме подобро да ги разберат заканите со кои се соочуваат и да ја одбранат својата земја од руските сили. На крајот, Украинците ги носат конечните одлуки за нивните операции, рече портпаролот на Пентагон, бригадниот генерал Пет Рајдер.

Додека украинската војска се подготвуваше за голема контраофанзива, САД ја повикаа Украина да избегне ќор-сокак на неколку фронтови со ограничување на целта и опсегот на операцијата. Цитирајќи ги изјавите на неколку украински и американски функционери, Си-Ен-Ен открива како САД користеле „воени игри“ за да ја подготват украинската армија за контранапад.

Украинската војска првично размислувала за поголем контранапад, но на крајот се фокусирала само на јужниот регион Херсон, кој Русите го зазеле на самиот почеток на инвазијата.

Одлуката за ограничување на нападот ја донел Киев по разговори со американски воени експерти. Овие дискусии вклучувале спроведување аналитички вежби, или симулирани „воени игри“, кои им покажале на Украинците какво оружје и нивоа на сили треба да користат, како и можни слаби точки на руската војска.

– САД водат рутински воен дијалог на повеќе нивоа со Украина. Нема да коментираме за спецификите на тие ангажмани. Генерално, им даваме информации на Украинците за да им помогнеме подобро да ги разберат заканите со кои се соочуваат и да ја одбранат својата земја од руските сили. На крајот, Украинците ги носат конечните одлуки за нивните операции – рече портпаролот на Пентагон, бригадниот генерал Пет Рајдер.

Украина употреби комбинација од герилски борци, прецизни удари со долг дострел и специјални сили во последните неколку недели за да изврши серија напади далеку зад руските линии, вклучително и на Крим, насочени кон логистика и командни и контролни пунктови, како подготовка за офанзива на југ.

Дека Украина се подготвува за голема контраофанзива беше јасно уште во јули кога украинскиот претседател Володимир Зеленски им нареди на своите воени команданти да направат планови кои ќе вклучуваат милион војници опремени со западно оружје. Претходните украински планови вклучуваа поамбициозни напори за враќање на другите територии изгубени со руската инвазија во последните шест месеци, вклучувајќи го и југоисточниот град Запорожје.

Но, претходно оваа недела стана јасно дека украинските власти се фокусирани на повторно преземање на регионот Херсон.

Вежбите за планирање на војната, исто така, им помогнаа на САД подобро да разберат каква опрема, муниција или разузнавачки информации би можеле да понудат што би биле најкорисни за Украина.

Така, Украина во последните два месеци побара и доби од САД оружје специјално приспособено на планираната контраофанзива на југ, како што е напредниот ракетен систем ХИМАРС. Покрај тоа, САД испратија артилериски гранати, минофрлачи и рачни противтенковски ракети Javelin во Украина за време на војната и обезбедија различни воени совети и разузнавачки информации.

И покрај софистицираното западно вооружување и обука, останува отворено прашањето колку Украина ќе биде успешна во враќањето на изгубената територија. Украинските власти веќе изјавија дека офанзивата во јужна Украина најверојатно ќе биде „бавна операција за уништување на непријателот“.

Русија сè уште има огромна супериорност во однос на вкупната работна сила и количината на артилерија.

Сепак, експертите оценуваат дека сега постои речиси паритет на моќта.

– Мислам дека сè уште не е можно да се потврди степенот на напредокот на Украина, но тие секако влијаеја на способноста на Русија да се движи на север и на југ преку реката Днепар со нивните напади врз мостовите – изјави во средата висок претставник на НАТО.

Украина е многу поблиску до Русија по бројот на војници во Херсон отколку што беше во последните недели во источните провинции на земјата, каде борбите се водат со месеци.

Нападите на Крим беа особено паметна стратегија, велат официјалните лица, бидејќи Русија го користи полуостровот како лансирна рампа за своите операции во јужна Украина. Украина сега се чини порамноправна со руските сили не само поради напредното западно вооружување што го користи ефективно, туку и затоа што Украинците продолжуваат да имаат предност во однос на моралот, кохезијата на единиците, тактичката острина и импровизациската способност.

Едноставно речено, Украина успеа да ја неутрализира предноста на Русите во работната сила и во оружјето со нејзината способност да води војна.