Остатоци од брод стар 4.700 години влегоа во Гинисовата книга на рекорди

Остатоци од брод стар околу 4.700 години, откриени при подводни археолошки ископувања во близина на островот Кекова, во јужната турска провинција Анталија, влегоа во Гинисовата книга на рекорди како најстари остатоци од брод во светот.

Хакан Ониз, раководител на Катедрата за конзервација и реставрација на културното наследство при Факултетот за ликовни уметности на Универзитетот „Акдениз“, изјави за агенцијата „Анадолу“ дека неговиот тим со години спроведува истражувања долж брегот на Средоземното Море, во име на Министерството за култура и туризам.

За време на подводните истражувања спроведени во близина на островот Кекова од 2024 година, истражувачите открија амфори стари околу 4.700 години на локалитет што сега е идентификуван како најстар потонат брод во светот.

„Ова е извор на гордост за нас. Како што рече нашиот претседател, Турција е една од водечките земји во светот во областа на подводната археологија. Според нас, таа е меѓу двете или трите најдобри земји“, рече Ониз.

Истакнувајќи го успехот на подводните ископувања, Ониз изјави дека откритието во близина на Кекова оваа недела добило официјално признание.

„Остатоците од бродот што ги откривме во регионот Кекова оваа недела влегоа во Гинисовата книга на рекорди како ‘најстари остатоци од брод во светот’, што беше и официјално објавено“, рече тој.

Остатоците од овој брод беа само еден од проектите на истражувачкиот тим.

„Го откривме во близина на Кекова во 2024 година, но кога првпат го пронајдовме, мислевме дека потекнува од отоманскиот период“, забележа Ониз.

Тој наведе дека истражувачите првично верувале оти остатоците од бродот потекнуваат од периодот пред 100 до 400 години, додека дотогаш главно се фокусирале на остатоци од бродови стари меѓу 2.000 и 2.500 години.

Сепак, подеталната анализа на предметите извадени од потонатиот брод – кој лежи на длабочина од 35 до 40 метри – како и научните истражувања, покажаа дека тој е значително постар.

„Остатоците од бродот кај Кекова се стари 4.700 години. Станува збор за пловило што датира од пред речиси 5.000 години. Некои од откриените предмети наликуваа на понови артефакти со кои не бевме доволно запознаени. Сепак, истражувајќи ја литературата минатата година, пронајдовме слични амфори во Египет“, рече тој.

Според него, кога се вратиле на локалитетот и спровеле дополнителни истражувања, сфатиле дека станува збор за остатоци од брод од раното бронзено време.

„Предметите што ги откривме, претежно амфори, моментално се во процес на конзервација и анализа, како во нашата регионална лабораторија, така и во лабораторијата за подводна археологија на Универзитетот Акдениз во Кемер“, рече тој.

Ониз додаде дека артефактите извадени од потонатиот брод во текот на наредните месеци ќе бидат изложени во новоизградениот музеј „Четири мориња, еден музеј“ во Истанбул, додека дел од предметите ќе бидат прикажани и во Медитеранскиот музеј за подводна археологија во Кемер, Анталија, чија изградба е при крај.