Хартиените сметки за вода и комуналии заминуваат во историјата: УЈП ги подготвува општините за е-Фактура

Хартиените сметки за вода, комунални и други јавни услуги постепено ќе се префрлаат во електронскиот систем за фактурирање. Управата за јавни приходи (УЈП) веќе ги вклучува општините и јавните претпријатија во пилот-фазата на проектот „е-Фактура“.

Еден од главните тестови во оваа фаза е да се провери како системот ќе се справи со стотици илјади сметки што секој месец се испраќаат до граѓаните.

На обуката организирана од УЈП и ЗЕЛС учествувале 80 претставници од општините и јавните претпријатија, при што се разгледувале практичните и техничките проблеми што треба да се решат пред целосното воведување на платформата.

Клучно прашање е како комуналните претпријатија ќе испраќаат масовен број фактури до домаќинствата и дали нивните информатички системи можат автоматски да се поврзат со УЈП преку API или ќе се користи бесплатната веб-апликација.

Во моментов се тестира целиот процес – од креирање и испраќање, до примање, проверка, прифаќање, одбивање и сторнирање на фактурите. Проектот веќе влезе во третата фаза, а во структурираното тестирање учествуваат околу 200 компании.

Најголемата промена за граѓаните ќе настане кога јавните комунални претпријатија целосно ќе се интегрираат, со што сметките ќе се издаваат и обработуваат електронски наместо на хартија.

Од УЈП напоменуваат дека хартиените сметки нема веднаш да се укинат. Од општините и јавните претпријатија е побарано што поскоро да се вклучат во пилот-фазата за навремено да се отстранат сите технички и административни пречки.