Западнонилска треска: Осум од десет заразени немаат симптоми, но има знаци што не смеат да се игнорираат

• Инкубацијата, односно периодот од заразувањето до појавата на првите симптоми, обично трае од три до 14 дена

Појавата на случаи на западнонилска треска предизвикува загриженост, особено во периодот кога комарците се најактивни. Сепак, убодот од комарец не значи дека човек е заразен, а дури и кај заразените болеста најчесто поминува без симптоми.
Според Светската здравствена организација (СЗО), околу 80 проценти од луѓето заразени со вирусот Западен Нил нема да почувствуваат никакви тегоби. Кај приближно 20 проценти може да се развие поблага форма на болеста, додека тешките невролошки компликации се многу поретки.

Како се пренесува вирусот

Вирусот најчесто се пренесува преку убод од заразен комарец. Комарците се инфицираат кога се хранат со крв од заразени птици, а потоа можат да го пренесат вирусот на луѓето и на другите животни.
Западнонилската треска не се пренесува преку кашлање, допирање, престојување во иста просторија или друг вообичаен контакт со заразено лице. Тоа значи дека заболениот човек не претставува опасност за семејството, колегите или луѓето со кои секојдневно се среќава.

Кои се најчестите симптоми

Инкубацијата, односно периодот од заразувањето до појавата на првите симптоми, обично трае од три до 14 дена.
Кај лицата што ќе развијат симптоми најчесто се појавуваат: покачена телесна температура; главоболка; замор и општа слабост; болки во мускулите и телото; мачнина или повраќање; осип на кожата; отечени лимфни жлезди.
Овие симптоми можат да наликуваат на други вирусни инфекции, па заболувањето не може да се утврди само според клиничката слика. За потврда се потребни соодветни лабораториски анализи.

Кога треба веднаш да се побара лекарска помош

Според процените на СЗО, приближно едно од 150 заразени лица може да развие тешка форма на болеста, при која се зафатени мозокот и мозочните обвивки.
Знаци за тревога се: висока температура проследена со силна главоболка; вкочанетост на вратот; дезориентираност или збунетост; нарушена свест; тресење или грчеви; изразена мускулна слабост; тешкотии при движењето.
При појава на вакви симптоми треба веднаш да се побара медицинска помош. Поголем ризик од тешко заболување имаат повозрасните лица и луѓето со ослабен имунитет, иако сериозна форма може да се развие на која било возраст.

Како да се намали ризикот

За западнонилската треска не постои вакцина за луѓето, ниту специфичен антивирусен лек. Затоа најважна е заштитата од убоди од комарци. Се препорачува користење средства против комарци во согласност со упатството, носење облека со долги ракави и ногавици и поставување заштитни мрежи на прозорците и вратите. Посебна претпазливост е потребна во самрак и рано наутро, кога многу комарци се најактивни.
Во домовите и дворовите треба редовно да се отстранува застоената вода од саксии, кофи, садови, стари гуми и други предмети во кои комарците можат да се размножуваат. Садовите за вода треба да се празнат, чистат или добро да се покриваат.
Лекарите објаснуваат дека нема причина за паника по секој убод од комарец. Потребни се разумна заштита, внимание на симптомите и навремено обраќање кај лекар доколку се појават знаци што упатуваат на потешка форма на заболувањето.