Откриен обид за криумчарење златен накит вреден 1,5 милиони денари на Блаце

Мобилен тим на Царинската управа спречи обид за криумчарење златен накит вреден околу 1,5 милиони денари на граничниот премин Блаце, на влез во државата.

Случајот бил откриен при контрола на возило управувано од македонски државјанин. Инспектори од Одделението за оперативни работи извршиле преглед поради основано сомневање, при што во возилото биле пронајдени кршено злато и златен накит.

Според Царинската управа, златото било завиткано во црна ќеса и сокриено во фиоката под возачкото седиште. Вкупната тежина на пронајдениот накит изнесува 324,7 грама.

Случајот е предаден на Одделението за истраги. Против лицето И.М. е поднесена кривична пријава до Основното јавно обвинителство Скопје за кривично дело криумчарење, казниво според Кривичниот законик.

Од Царинската управа посочуваат дека мобилните царински тимови продолжуваат со засилени контроли за спречување нелегална трговија и внесување непријавена стока во државата.