Американскиот потпретседател: Малку е веројатно дека мировниот договор ќе задоволи која било страна 

Потпретседателот на Соединетите Американски Држави, Џеј Ди Венс, изјави дека е малку веројатно дека преговарачкото решение меѓу Русија и Украина ќе ги задоволи двете страни и дека секој мировен договор веројатно ќе ги остави и Москва и Киев „незадоволни“.

Тој кажа дека целта на САД е договор што двете земји можат да го прифатат.

„Тоа нема да направи никого особено среќен. И Русите и Украинците веројатно ќе бидат незадоволни од него на крајот на денот“, кажа тој за Фокс њуз.

Претседателот на САД, Доналд Трамп, изјави во петокот дека ќе се сретне со рускиот претседател Владимир Путин на Алјаска на 15 август за да преговара за прекин на војната во Украина.

Трамп изјави дека Русија и Украина се блиску до договор за прекин на огнот што би можел да го оконча три и полгодишниот конфликт и кој евентуално би барал од Украина да се откаже од значителна територија.

Украинскиот претседател Володимир Зеленски, сепак, изјави во саботата дека Украина не може да го прекрши својот устав по територијални прашања, додавајќи: „Украинците нема да ја дадат својата земја на окупатори“

Во интервју за Фокс њуз, снимено во петокот, Венс рече дека САД работат на координирање на датумите за разговорите меѓу Путин, Зеленски и Трамп, но дека не мисли дека би било продуктивно Путин да се сретне со Зеленски пред да разговара со Трамп, објави Ројтерс.

„Сега сме во фаза кога се обидуваме, искрено, да го утврдиме распоредот и слични работи, за да можат овие тројца лидери да седнат и да разговараат за прекин на овој конфликт“, рече тој.

Официјален претставник на Белата куќа изјави доцна во саботата дека Трамп е отворен за самит со двајцата лидери, но дека во моментов се планира билатерална средба на барање на Путин.