Ѓоковиќ: Мојот однос со Федерер секогаш бил само професионален

Новак Ѓоковиќ по победата во првото коло на турнирот од серијата АТП 500 во Базел зборуваше за својот однос со најпознатиот жител на овој град, Роџер Федерер.

„Нашиот однос никогаш не ги надмина границите на професионалното“, истакна Новак.

„Отсекогаш чувствував голема почит кон него, бидејќи многу придонесе за тенисот. Привлече многу млади луѓе и за тоа сум му благодарен, но никогаш немавме некаков однос надвор од теренот“, додаде српскиот ас.

Српскиот тенисер смета дека во тоа нема ништо погрешно.

„Така и треба да биде, бидејќи ние секогаш бевме големи ривали“, додаде тој.

Сепак, не може да се занемари ниту фактот дека и самиот Федерер има одредена одговорност за студениот однос на почетокот на нивното ривалство, иако тој подоцна делумно се подобри. На Дејвис купот во Женева во 2006 година, токму Федерер остро го критикуваше Ѓоковиќ поради неговите физички проблеми и предавањата на натпреварите.

Кога Ѓоковиќ допрва се пробиваше кон светскиот тениски врв, имаше сериозни проблеми со дишењето и алергиите, а состојбата беше решена во периодот во 2010 година.

Сепак, Федерер не го поштеди Ѓоковиќ од критики за време на тој дуел, иако не ги знаеше вистинските причини за неговите проблеми.

„Иако Новак беше присутен на прошталниот настап на Роџер на Лејвер купот во Лондон во 2022 година, и понатаму е очигледно дека меѓу нив постои одредена дистанца“, пишува тенискиот портал „Пунто де Брејк“, опишувајќи го односот меѓу двајцата тениски великани.