Француски специјалци упаднале на руски танкер во Медитеранот

Француската морнарица, дејствувајќи врз основа на британски разузнавачки информации, денес пресретна танкер кој превезувал руска нафта во Средоземно Море. Оваа акција е насочена против санкционираната руска „флота во сенка“, објавија официјални лица, а пренесува Асошиејтед прес.

Француските поморски власти за Средоземјето соопштија дека бродот Гринч бил осомничен дека пловел под лажно знаме. Француската морнарица, чии специјални сили се качиле на танкерот, го следела бродот до пристаниште за дополнителни проверки, се додава во соопштението за медиумите. Приходите од нафта се клучен дел од руската економија, што му овозможува на претседателот Владимир Путин да инвестира во воените напори против Украина без да ја влоши инфлацијата за населението и да избегне колапс на валутата.

Франција и други земји порачаа дека ќе се справат со „флотата во сенка“ од танкери за нафта која ги крши санкциите, а експертите проценуваат дека таа брои повеќе од 400 бродови. Тие исто така се обидуваат да се договорат со земјите под чии знамиња пловат бродовите за да го олеснат качувањето.