ФИА сака да му ја земе титулата на Ферстапен, се огласија од Ред Бул

Директорот на тимот на Ред Бул, Кристијан Хорнер денеска ги отфрли тврдењата дека тимот го прекршил буџетскиот лимит во Формула 1 минатата година и рече дека се размислува за правна постапка доколку овие „фиктивни тврдења“ не бидат повлечени.

Формула 1 лани постави буџет од 145 милиони долари. Возачот на Ред Бул, Макс Верстапен, потоа ја освои својата прва шампионска титула во контроверзниот финиш на последната трка од сезоната во Абу Даби, бидејќи го победи Луис Хамилтон од Мерцедес по погрешните одлуки на управата на трката.

Италијанските и германските медиуми објавија дека Ред Бул го пречекорил буџетот за пет отсто, односно за околу седум милиони долари, што претставува сериозна материјална повреда за која се казнува забрана. Помалку од пет проценти се смета за полесен прекршок што може да доведе до одземање на поени или суспензија. Сепак, не се чини дека на Верстапен ќе му биде одземена титулата.

Директорот на Мерцедес, Тото Волф, ја повика Меѓународната автомобилска федерација (ФИА) да преземе мерки доколку Ред Бул или други тимови ги прекршат правилата. Истото го побара и Ферари.

„Бевме малку изненадени од коментарите на нашите два ривалски тима. Поднесоците помеѓу ФИА и тимовите се доверливи, не знам какво е нивото на поднесоци од нашите ривали и навистина сум љубопитен од каде доаѓа нивниот извор на информации за овие фиктивни тврдења“, рече Хорнер.

Тој рече дека тоа е клевета и дека времето на објавување на ваквите тврдења е поврзано со Ферстапен, кој е на чекор од освојување на втора последователна шампионска титула.

„Може да се претпостави дека не е случајно што ова доаѓа во време кога Макс го има својот прв обид за освојување на шампионатот. Овде зборуваме за ограничување на трошоците, а не за феноменалните перформанси што ги прикажа Макс минатата година. Тоа е прикриена тактика која се користи за евентуално минимизирање на недостатокот на перформанси на нашите ривали“, рече Хорнер.

Од 2014 година, Мерцедес освојуваше титули кај конструкторите, но неговите возачи Хамилтон и Џорџ Расел не освоија ниту една сезонава.

Ферари последен пат беше шампион во 2007 година кога Кими Раиконен ја освои титулата, а оваа сезона тимот го одбележаа бројни грешки.

ФИА соопшти дека во тек е евалуација на финансиските податоци доставени од тимовите за 2021 година.

„Наводните прекршувања на финансиските регулативи, доколку ги има, ќе се решаваат во согласност со формалниот процес утврден во правилата. ФИА ги забележува значителните и неосновани шпекулации и претпоставки околу оваа работа, повторува дека проценката е во тек и дека процесот ќе се следи без да се размислува за какви надворешни дискусии“, се наведува во соопштението.

Хорнер рече дека тимот е подготвен да преземе правни мерки доколку не се повлечат обвинувањата против Ред Бул.

„ФИА рече дека не го завршила процесот и ако овие изјави не бидат повлечени, ќе го сфатиме многу сериозно. Ќе ги разгледаме сите достапни опции, како вчерашните коментари, кои го клеветат тимот, брендовите и Формула 1 се апсолутно неприфатливи“, додаде тој.

ФИА треба да донесе одлука до среда, кога ќе ги издаде соодветните сертификати, со шпекулации дека Астон Мартин е вториот тим што наводно ги прекршил ограничувањата од 2021 година.