Алармантен бран на семејно насилство: Полицијата интервенирала во пет тешки инциденти за само едно деноноќие

Во изминатите 24 часа полицијата постапувала по пет одделни случаи на семејно насилство, при што три лица биле лишени од слобода, а во неколку случаи жртви биле и малолетни деца.

Една мајка пријавила дека нејзиниот поранешен сопруг физички ја нападнал нивната малолетна ќерка, по што надлежните започнале постапка за целосно расчистување на случајот.

Во друг случај, 56-годишен маж бил приведен поради сомнение дека физички ја нападнал својата вонбрачна партнерка во семејниот дом.

Полицијата привела и 48-годишен маж, кој според пријавата физички ги нападнал сопругата и нивните две малолетни ќерки. По завршување на истрагата ќе бидат преземени соодветни законски мерки.

Во уште еден инцидент, 52-годишен маж им се заканувал на своите синови со остар предмет, а потоа со секира оштетил дел од покуќнината во домот.

Дополнително, пријавен е случај во кој маж физички ја нападнал својата 17-годишна партнерка, ѝ се заканувал со остар предмет, а според пријавата го удрил и нивното 11-месечно бебе.

Полицијата работи на целосно документирање на сите случаи, по што против осомничените ќе бидат поднесени соодветни пријави.