Три додатоци во исхраната што треба да се земаат со магнезиум за подобар сон

Комбинирањето на магнезиумот со одредени додатоци во исхраната може да го засили неговото дејство за опуштање и подобар сон.

Соодветното ниво на магнезиум во организмот се поврзува со поквалитетен сон, подолго спиење и помало чувство на замор во текот на денот.

Магнезиумот го подготвува организмот за сон на неколку начини:

– Го смирува нервниот систем.

– Помага во регулирањето на расположението.

– Ги опушта мускулите.

Земањето магнезиум во комбинација со други додатоци во исхраната може да ја зголеми нивната ефикасност и да придонесе за подлабок сон.

Ашваганда

Ашвагандата е адаптоген, растителна супстанција што му помага на организмот да се приспособи на стресот и да ја одржува рамнотежата. Комбинирањето ашваганда со магнезиум може да придонесе за подобро опуштање и поквалитетен сон.

Ашвагандата помага во смирувањето на организмот и може да биде особено корисна за луѓето што страдаат од анксиозност и истовремено имаат проблеми со спиењето.

Л-теанин

Слично како ашвагандата, Л-теанинот придонесува за опуштање и смирување на организмот. Некои истражувања покажуваат дека неговото земање пред спиење може да го скрати времето потребно за заспивање и да го намали бројот на прекините на сонот во текот на ноќта.

Комбинирањето Л-теанин со магнезиум може да го подобри вкупниот квалитет на сонот благодарение на нивното заедничко дејство врз стресот и опуштањето.

Сепак, најголем дел од истражувањата за нивното синергиско дејство се спроведени врз животни. Потребни се дополнителни истражувања за да се потврдат овие ефекти кај луѓето.

Мелатонин

Некои луѓе комбинираат мелатонин со магнезиум за да го засилат позитивното дејство на двете супстанции врз сонот.

Магнезиумот помага во намалувањето на стресот и поттикнува опуштање, додека мелатонинот му сигнализира на организмот дека е време за спиење.

Мелатонинот е хормон што природно се произведува во организмот и помага во регулирањето на циклусот на спиење и будност, познат како циркадијален ритам. Кога ќе се стемни, мозокот ослободува повеќе мелатонин за да го подготви организмот за сон.

Мелатонинот може да биде особено корисен за луѓето чиј распоред на спиење не е усогласен со природната дневна светлина, како што се оние што работат ноќни смени или имаат нарушен биолошки ритам поради патување низ различни временски зони.