Жестоки немири во Тирана: горат државни згради и банки, 55 уапсени, десетици повредени
Трет ден продолжуваат масовните антивладини протести во Албанија, кои прераснаа во насилни судири меѓу демонстрантите и полицијата. Во Тирана се запалени делови од државни згради и банки, искршени се излози, а демонстрантите фрлаа камења и молотови коктели кон полицијата. Досега се уапсени 55 лица, меѓу кои и двајца малолетници. Премиерот Еди Рама одбива да поднесе оставка.
Во Албанија трет ден по ред продолжуваат жестоките антивладини протести, кои почнаа поради незадоволството на студентите од високите трошоци за образование, лошите услови на универзитетите и слабите можности за вработување по дипломирањето. Протестите брзо прераснаа во поширок бунт против владата на премиерот Еди Рама, придружен со обвинувања за корупција и барања за негова оставка.
Најжестоките немири избувнаа вчера, кога десетици илјади демонстранти излегоа на улиците на Тирана. Беа нападнати повеќе државни институции, меѓу кои Министерството за образование, Министерството за внатрешни работи и Министерството за економија. Според албанскиот портал Шќиптарја, нападнати биле најмалку осум државни институции, а пожари избувнале во неколку министерства. Оштетени се и банки, продавници и друг приватен имот.
