Еболата се шири низ Африка, потврдена зараза и во Нигерија

Нигериската влада потврди случај на ебола во главниот град Абуџа, откако лабораториските тестови покажаа дека една жена е заразена со вирусот. Пациентката допатувала во Нигерија од Уганда, изјави министерот за здравство Мухамед Али Пате за јавната телевизија.

Министерството за здравство на Уганда соопшти дека жената претходно престојувала во источниот дел на Демократска Република Конго поради деловни обврски. Таа поминала низ Уганда на почетокот на октомври, при што тогаш немала никакви симптоми на болеста. Симптомите се појавиле дури по нејзиното пристигнување во Нигерија.

Во средината на мај, во Демократска Република Конго беше прогласена појава на ебола, која оттогаш прерасна во втората најголема епидемија на ебола некогаш забележана во светот. Предизвикана е од редок сој на вирусот, познат како „бандибјугио“.

Еболата се прошири и во Кенија, каде што овој месец беа пријавени девет случаи на зараза, сите се поврзани со лице кое допатувало од Конго.

Водечката африканска агенција за јавно здравје започна со организирање помош за Нигерија, потврди нејзиниот лидер, Жан Касеја. „Оваа епидемија на ебола од сојот „бандибјугио“ веќе стана географски најраспространетата во историјата, зафаќајќи земји во три африкански региони“, напиша Касеја на социјалната мрежа Икс.