Трамп денес разговара со Путин и Зеленски за окончување на војната

Американскиот претседател Доналд Трамп планира денес телефонски да разговара со рускиот претседател Владимир Путин и украинскиот претседател Володимир Зеленски. Според извор запознаен со ситуацијата, Трамп прво ќе разговара со Путин, а потоа и со Зеленски, откако неговите претставници ќе го информираат за последната рунда преговори. Американски функционер потврди дека разговорите треба да се одржат во текот на денот.

На овие повици им претходеше посетата на специјалните претставници на американскиот претседател на Украина. Џаред Кушнер и Стив Виткоф пристигнаа вчера во Киев со воз, а Зеленски се сретна со нив на плоштадот Софија. Официјалните преговори почнаа по посетата на катедралата Света Софија.

По првата рунда разговори, Кушнер во изјава за медиумите изјави дека Трамп цврсто решил да ја оконча војната. Американските претставници го напуштија Киев синоќа со специјален воз.

Зеленски претходно објави дека во Киев ќе се одржат неколку рунди преговори. По средбата со американските претставници, планирани се разговори со учество на преговарачи од Франција, Британија и Германија.