Првото полуфинале на Евросонг ќе се одржи вечерва во Виена

Првото полуфинале на Евровизискиот натпревар ќе се одржи вечерва во Виена. Шпанија, Ирска, Холандија, Словенија и Исланд го бојкотираат овогодишниот натпревар за песна на Евровизија во знак на протест затоа што организаторите му дозволија на Израел да се натпреварува.

Оваа недела во австриската престолнина се планирани повеќе пропалестински демонстрации, а безбедносните мерки се засилени. Полициски службеници од цела Австрија се распоредени во Виена, со поддршка од силите од соседна Германија.

Дополнителна загриженост предизвика случајот со 21-годишниот Австриец кој призна вина за планирање напад на концертот на Тејлор Свифт во Виена во 2024 година.

За победата се натпреваруваат 35 земји. Во првото полуфинале во салата „Винер Штадхале“ ќе настапат 15 изведувачи, меѓу кои и израелскиот пејач Ноам Бетан, кој се обидува да обезбеди место во финалето со песната „Мишел“. Во финалето ќе се пласираат првите 10 од вторникот и уште 10 од второто полуфинале, кое ќе се одржи во четврток, 14 мај.

Велика Британија, Франција, Германија и Италија веќе имаат обезбедено место во финалето како најголеми финансиери на натпреварот, додека Австрија е директно во финалето како минатогодишен победник и домаќин.

Меѓу фаворитите за висок пласман се издвојува Финска со песната „Фрлач на пламен“, додека вниманието го привлекуваат и грчкиот претставник Акилас, португалската група Бандидос до канте и Сенхит од Сан Марино.

По обвинувањата за манипулација со гласовите минатата година, Европската радиодифузна Унија ги промени правилата за гласање и го преполови максималниот број гласови по лице на 10, со дополнителни мерки против сомнително или координирано гласање.