Повеќе од 3.000 загинати во протести низ Иран

Повеќе од 3.000 лица загинаа на протестите низ Иран, соопшти американската група за човекови права ХРАНА, додека по прекинот од осум дена е забележан само незначителен пораст на интернет активноста во земјата.

Американската група за човекови права соопшти дека потврдила 3.090 смртни случаи, вклучувајќи 2.885 демонстранти, додека жителите и државните медиуми посочуваат дека безбедносните мерки во голема мера ги потиснале протестите засега и дека апсењата продолжуваат, пренесува Ројтерс.

Според сведоштва на неколку жители со кои контактираше Ројтерс, Техеран веќе четири дена е релативно мирен.

Иако беа забележани дронови над градот, немаше знаци за поголеми протести во четврток и петок.

Жителите на другите делови на земјата, вклучувајќи го северот на Иран на брегот на Каспиското Море, исто така пријавија мирни улици.

Протести избувнаа на 28 декември поради економските тешкотии, потоа прераснаа во масовни демонстрации со барања за завршување на клерикалната власт, кулминирајќи со насилство кон крајот на минатата недела.

Опозициските групи и еден ирански функционер претходно изјавија дека повеќе од 2.000 луѓе се убиени во она што се смета за најлоши внатрешни немири од Исламската револуција во 1979 година.

Групата за мониторинг на интернет НетБлокс соопшти дека по околу 200 часа прекин, имало „многу мало зголемување“ на конекциите, кои останале на околу два проценти од нормалното ниво.

Американскиот претседател Доналд Трамп изјави дека иранските власти ги откажале планираните масовни егзекуции на демонстранти, иако Иран официјално не објавил такви егзекуции или нивно откажување.

Индиските студенти и аџии кои се враќале од Иран рекле дека најчесто биле ограничени во своите сместувачки капацитети и без комуникација со своите семејства за време на престојот.

Индиското Министерство за надворешни работи соопшти дека комерцијалните летови се достапни и дека презема мерки за безбедноста на своите граѓани.