Охридските мозаици и фрески влегоа во аеродромскиот терминал
Патниците што од денеска ќе минуваат низ терминалот на охридскиот аеродром „Св. Апостол Павле“ ќе ги пречекуваат реплики на мозаици и фрески од Охрид.
Реконструираната терминална зграда беше пуштена во употреба денеска, а во ново уредените простории се поставени реплики на мозаици од Стариот град, меѓу кои и од Плаошник, како и реплики на фрески од црквата „Света Софија“.
Реконструкцијата чини 2,7 милиони евра и, покрај уредувањето на ентериерот, опфаќа проширување на просторот за чекирање, зголемен број шалтери, измени во зоните за безбедносна контрола и рачен багаж, реорганизација на паркингот и поставување нова опрема.
„Овој аеродром е еден мал музеј кој го претставува регионот“, рече министерот за транспорт Александар Николоски при пуштањето во употреба.
Реконструкцијата е изведена без затворање на аеродромот, кој продолжил да работи и за време на градежните активности.
