Израелскиот парламент ги направи првите чекори за анексија на окупираниот Западен брег 

Нацрт-законот со кој израелското законодавство би се применило и на окупираниот Западен Брег, потег што е еднаков на анексија на териториите кои се дел од идната палестинска држава, денес доби прелиминарно одобрение од израелскиот парламент.

Гласањето е прво од четирите потребни за усвојување на законот и е темпирано да се совпадне со посетата на американскиот потпретседател Џеј Ди Венс на Израел, еден месец откако претседателот Доналд Трамп изјави дека нема да дозволи Израел да го анектира Западниот Брег.

Партијата Ликуд на премиерот Бенјамин Нетанјаху не го поддржа законот предложен од пратеници надвор од неговата владејачка коалиција. Тој беше усвоен со 25 гласа „за“ и 24 „против“ од вкупно 120 пратеници. Вториот закон на опозициската партија со кој се предлага анексија на населбата Маале Адумим беше усвоен со 31 глас „за“ и 9 „против“.

Некои партии во коалицијата на Нетанјаху – партијата Еврејска моќ на министерот за национална безбедност Итамар Бен-Гвир и фракцијата Религиозен ционизам на министерот за финансии Безалел Смотрич – гласаа за законот, кој ќе мора да помине низ долга законодавна постапка пред конечно да биде усвоен.

Членови на коалицијата на Нетанјаху со години бараат Израел формално да анектира делови од Западниот Брег.

Израел тврди дека териториите освоени во војната во 1967 година не се окупирани во правна смисла бидејќи се наоѓаат на спорно земјиште, додека Обединетите нации и поголемиот дел од меѓународната заедница ги сметаат за окупирани.

Во 2024 година највисокиот суд на ОН прогласи дека окупацијата на палестинските територии од страна на Израел, вклучувајќи го и Западен Брег, како и изградбата на еврејски населби во областа, се нелегални.

Владата на Нетанјаху ја разгледуваше анексијата како можен одговор на потезите на голем број западни сојузници за признавање на палестинска држава во септември, но се чинеше дека се откажа од потегот по приговорот на Трамп.

Палестинската исламистичка група Хамас денес во соопштението изјави дека гласањето за законот за Западниот Брег и Маале Адумим го покажува „грдото лице на колонијалната окупација“.

Самиот Нетанјаху не беше експлицитен во врска со анексијата откако последното изборно ветување беше отфрлено во 2020 година во корист на нормализирање на односите со Обединетите Арапски Емирати и Бахреин.

ОАЕ, најистакнатата арапска земја која воспостави врски со Израел според таканаречените Авраамски договори кои Трамп ги постигна во својот прв мандат, минатиот месец предупреди дека анексијата на Западниот Брег е црвена линија за оваа држава од Персискиот Залив.