ЕУ разгледува мисија за обука на 3.000 палестински полицајци во Газа
Министрите за надворешни работи на ЕУ следната недела ќе разговараат за предлогот блокот да ја преземе водечката улога во обуката на 3.000 палестински полицајци со цел нивно евентуално распоредување во Газа, објави Ројтерс, повикувајќи се на документ во кој увид имал Ројтерс.
Во документ изготвен пред министерскиот состанок на 20 ноември, за кога е закажана донаторска конференција за Палестинската самоуправа (ПА), официјалните лица ги наведоа опциите за придонес кон спроведувањето на планот од 20 точки за Газа предложен од американскиот претседател Доналд Трамп.
Израел и палестинската милитантна група Хамас се согласија за првата фаза од планот во октомври, но спроведувањето на понатамошните делови од договорот останува многу неизвесно.
Во документот, Европската служба за надворешни активности ги наведе предлозите за проширување на двете цивилни мисии на блокот во регионот, кои се фокусираат на гранична помош и поддршка за реформите на полицијата и судството на Палестинската самоуправа (ПА).
Мисијата за поддршка на полицијата на ЕУ би можела „да ја преземе водечката улога во обуката на палестинските полициски сили во Газа преку обезбедување директна обука и поддршка на приближно 3.000 палестински полицајци (на платен список на Палестинската управа) од Газа, со цел обука на сите 13.000 припадници на палестинските полициски сили“, се вели во документот.
Проширувањето на цивилната мисија на ЕУ за надзор на границите во Рафа на други гранични премини исто така се разгледува.
Но, перспективите за напредок на ЕУ со овие иницијативи остануваат нејасни.
Мисијата на ЕУ за следење на граничниот премин Рафа, помеѓу Газа и Египет, првично беше формирана во 2005 година, но беше затворена откако Хамас ја презеде целосната контрола врз енклавата две години подоцна, соборувајќи ја Палестинската управа со која претходно ја делеше власта во Појасот Газа.
Во четврток, Русија предложи своја нацрт-резолуција на ОН за Газа како противтежа на напорите на САД да усвојат свој текст на резолуцијата со кој ќе се поддржи планот на претседателот Трамп.
