ДДВ за станови останува 5% до крајот на 2028 година

Добра вест за сите што планираат да го решат станбеното прашање. Собранието денеска ја усвојува измената на Законот за данокот на додадена вредност, со која повластената стапка од 5% за прв промет на станови ќе важи сè до декември 2028 година.

Ова го соопшти пратеничката од ВМРО-ДПМНЕ, Катерина Димитровска, која појасни дека без оваа измена, од јануари 2026 година данокот требаше да скокне на 18%, што драстично ќе ги покачеше цените.

„Ова значи дека за стан од околу 70 метри квадратни, граѓаните можат да заштедат и до 15.000 евра, секако, во зависност од купопродажната цена. Тоа е сериозна и реална поддршка, а не декларативна политика“, истакна Димитровска.

Мерката се однесува на прв промет на станбени згради и станови кои се користат за станбени цели.