Голем успех: Евгениј Поп Ацев стана петтиот Македонец кој го препливал Ла Манш 

Трикратниот светски шампион во маратонско пливање, Евгениј Поп Ацев направи уште еден подвиг во својата кариера, го преплива каналот Ла Манш.

Евгениј Поп Ацев во 2023 година имаше еден неуспешен обид да го направи тоа, но се врати и успеа. Тој патеката на каналот меѓу Франција и Велика Британија ја мина со фантастично време од девет часа и 43 минути.

Поп Ацев стана само петтиот Македонец кој го препливал Ла Манш, претходно тоа го направија Нико Нестор во 1959 година, Атина Бојаџи во 1969, Томи Стефановски во 2009 и Игор Димовски една година подоцна.

Евгениј Поп Ацев е дел од Куќата на Славните во маратонското пливање во светот, тој има настапи на 107 настани меѓу 2007 и 2021 година.

Ла Манш се смета за „Монт Еверест на пливањето“, зошто неговото препливување е голем предизвик?

Најтесната точка помеѓу Англија (Довер) и Франција (Кале) е околу 34 километри. Но, пливачите ретко минуваат точно толку – поради силните плима и осека, струи и ветрови, реалната дистанца често станува 40–45 км, а понекогаш и повеќе.

Километрите не се тие кои се страшни, борбата со силните морски струи и бранови ја прават рутата непредвидлива, па пливачите не можат да пливаат по права линија. Водата е студена, обично меѓу 15 и 18 степени, што бара голема издржливост. Во каналот се случува и густ морски сообраќај, полн е и со жива природа како медузи и морски животни. Пливањето може да трае 12-16 часа, а може и повеќе, што е вистински тест за менталната сила на пливачот. Поради тоа времето од девет часа и 43 минути на Евгениј Поп Ацев се смета за фантастичен успех.