Во Клиниката во Козле хоспитализирани 60 деца со респираторни инспекции

Од едномесечно бебе до училишни деца е моменталната состојба со хоспитализации во Клиниката за белодробни заболувања во Козле. На болничко лекување имаат 60 пациенти и кај нив респираторните инфекции се со потешка клиничка слика која не може да биде третирана во домашни услови. За едно деноноќие лекарите прават  до 150 прегледи, но се уште немаат потврден случај на грип. 

– Обично вирозите почнуваат со растечено носе, температура а може и кашлица и би требало неколку дена да се следи во домашни услови доколку не ескалираат симптомите. Е сега доколку почне отежнато дишење, забрзано дишење со стомачето ќе го приметат родителите или кашлицата стане поинтензивна, тогаш да се обратат на лекар првично кај матичниот па ако има потреба и во нашата установа за хоспитализација, вели проф. д-р Катерина Бошковска директор на Клиниката за белодробни заболувања Козле. 

Отежнато дишење, свирење во градите  и зголемена телесна температура се најчестите симптоми поради кои родителите спасот за своите деца го бараат во клиниката Козле. Иако гужвите почнаа од установата велат дека се уште имаат простор за хоспитализации. Дел од оние кои се на болничко лекување имаат потреба и од кислородна поддршка. 

– Неколку пациенти примаат кислородна поддршка дали континуирано или дисконтинуирано. Децата кога ќе заспијат во сон имаат повеќе потреба од кислородна поддршка, но не се многу пациенти. Повеќе тоа се доенчињата, помалите деца со бронхиолити, вели д-р Бошковска. 

Според последниот извештај на Институтот за јавно здравје, не е зголемен бројот на децата кои се пријавени со симптоми на грип или заболувања слични на вирусот. Лекарите пикот го очекуваат во јануари.