Белата куќа објави видео со холивудски ликови за „правдата на американски начин“

Администрацијата на Доналд Трамп објави пропагандно видео со холивудска тематика во кое се ветува „правда на американски начин“ против Иран. Видеото, објавено на официјалниот профил на Белата куќа на Икс, предизвика силни критики и потсмев на интернет, при што некои го нарекоа „слопаганда“ (шунд-пропаганда).

Во 42-секундното видео се појавуваат сцени од повеќе познати филмови и серии. Почетокот е со ликот Тони Старк од филмот „Ајронмен 2“, кого го игра Роберт Дауни Џуниор. Потоа следуваат сцени со Расел Кроу во „Гладијатор“, Мел Гибсон во „Брејвхарт“ и Том Круз како пилотот Маверик во „Топ ган“.

Во видеото се појавуваат и ликови од серијата „Брејкинг бед“, вклучувајќи го адвокатот Џими Мекгил (Сол Гудман), како и Волтер Вајт, кого го игра Брајан Кренстон. Се појавува и Кијану Ривс во сцена од филмот „Џон Вик“.

Неколкумина од актерите што се појавуваат во видеото — меѓу нив Роберт Дауни Џуниор и Брајан Кренстон — претходно јавно го критикуваа Трамп и го поддржаа неговиот противкандидат на изборите во 2024 година.

Видеото завршува со монтажи од акциски и цртани херои, како и со министерот за одбрана Пит Хегсет, додека се слуша глас од видеоиграта „Мортал комбат“ со пораката „совршена победа“, над натписот „Белата куќа“.

Според критичарите, администрацијата на Трамп сè почесто користи провокативни визуелни материјали и вештачка интелигенција за политичка пропаганда на социјалните мрежи. Исто така не е јасно дали Белата куќа добила дозвола за користење на сцените од филмовите и сериите.