Албанците, Полјаците и Романците се најчестите странци меѓу затворениците во Велика Британија

Бројот на странци во британските затвори за сериозни насилни, сексуални и кривични дела нагло пораснал во изминатата година. Моментално има 1.731 странски државјанин кои отслужуваат казна во затворите во Англија и Велс за сексуални прекршоци, што претставува 10,6 отсто од сите затвореници осудени за сексуални прекршоци.

Овој број се зголемил за речиси 10 отсто во последните 12 месеци, односно речиси три пати повеќе отколку кога станува збор за британски државјани. На крајот на јуни имало 10.722 странски криминалци и осомничени во затворите во Англија и Велс, додека вкупната затворска популација во Велика Британија опаѓала, според бројките на министерството за правда.

Бројот на затвореници родени во странство сега е највисок од 2013 година. Нивниот престој во затвор чини околу 580 милиони фунти годишно. Зголемувањето е поттикнато од рекордната имиграција по 2020 година и големиот број луѓе во притвор кои чекаат судење. Судиите често одбиваат кауција на странски обвинети поради нивниот поголем ризик од напуштање на Британија.

Конзервативната опозиција го повика британскиот премиер Кир Стармер да воведе итни мерки за депортација на целата популација на странски затвореници, заканувајќи се дека ќе ги суспендира визите за земјите кои одбиваат да ги примат назад.

„Странските државјани се презастапени во притворските затвори. Веројатноста некој да изврши кривично дело варира во зависност од тоа од каде доаѓаат, но и од нивната возраст, пол и социоекономски статус. Странските државјани се во просек помлади од Британците, а помладите луѓе имаат поголема веројатност да извршат кривично дело“, вели Бен Бриндл од Универзитетот во Оксфорд.

Вкупната затворска популација во Англија и Велс се намалила за 0,44 отсто на 87.334 затвореници во јуни оваа година, но бројот на странски затвореници се зголемил за 3,2 отсто. Кризата со пренатрупаност во затворите ја принудила владата да воведе драстични мерки за предвремено ослободување. Овие мерки довеле до зголемување на стапката на повторни кривични дела.

Странските затвореници сочинуваат 85 отсто од затворската популација во некои лондонски затвори. Албанските, полските и романските затвореници сочинуваат една четвртина од сите странски затвореници. Странците сочинуваат 12,5 отсто од вкупната затворска популација.

Бројот на странски криминалци во затворите во Англија и Велс за кривични дела насилство врз лица се зголемил за 8,8 отсто, во споредба со зголемувањето од 4,8 отсто за британските сторители. Во случај на грабежи, има зголемување од 7,8 отсто кај странските сторители, додека бројот на Британци затворени за истото кривично дело се намалил за 5,5 отсто.