Верстапен би вовел радикална промена во Ф1: Би дошол дури во сабота, три тренинзи можат да станат здодевни
Четирикратниот светски шампион Макс Верстапен гостуваше во поткастот „П1“, каде што во опуштен разговор зборуваше за бројни теми од светот на Формула 1. Холанѓанецот се осврна на социјалните мрежи, најдобрите претекнувања во кариерата, форматот на тркачките викенди, но и на актуелната генерација болиди.
Како и многупати досега, Верстапен без многу заобиколување го кажа своето мислење, а особено интересно беше да се слушне како би изгледал викендот во Формула 1 кога тој би одлучувал. Една од темите на разговорот беа социјалните мрежи. Верстапен има профили на „Икс“ и на Инстаграм, но се осврна на количината на содржина што денес може да се најде таму.
„Имам Икс и Инстаграм и таму има секакви работи. Можете да завршите во вистинска зајачка дупка. Денес е лудо што сè може да се направи“, рече Верстапен.
Меѓу најдобрите претекнувања го избра она на Пјастри
Четирикратниот светски шампион беше прашан и кое претекнување го смета за едно од најдобрите во досегашната кариера. Зад себе има голем број спектакуларни маневри, но меѓу првите што му паднаа на памет беше нападот на Оскар Пјастри во Имола. Верстапен објасни дека тој потег особено му останал во сеќавање затоа што бил неочекуван.
Пјастри почна да сопира порано, Холанѓанецот ја препозна можноста и реши да „профучи“ покрај него. Тоа беше еден од оние потези при кои возачот нема време за калкулации. Верстапен веднаш ја искористи шансата.
Особено интересен дел од разговорот се отвори со прашањето за сè поголемиот број спринт-викенди во Формула 1. Верстапен беше прашан како би изгледал неговиот идеален тркачки викенд, доколку можеше самиот да избира. Одговорот не можеше да биде поедноставен.
„Да дојдеме во сабота наутро, да го одработиме првиот слободен тренинг, потоа квалификациите, а во недела трката. Едноставно“, рече Верстапен.
Таквиот формат практично би го елиминирал петокот од возачкиот дел на викендот и би им оставил на тимовите само еден тренинг пред квалификациите. Верстапен, сепак, добро разбира зошто Формула 1 не оди во таа насока.
„Но, токму тоа е проблемот. Разбирам дека мора комерцијално да го искористат петокот. Мора комерцијално да ги искористат саботата и неделата. Затоа разбирам дека петокот мора да биде возбудлив, саботата мора да биде возбудлива, како и неделата.“
Токму затоа, иако спринт-форматот не е нешто што лично би го избрал кога би гледал исклучиво од перспектива на возачот, тој разбира зошто е попривлечен за публиката.
„Разбирам дека спринт-форматот е подобар, односно веројатно позабавен за повеќето луѓе кои се на патеката бидејќи има повеќе тркање. Но, како возач, јас на тоа гледам исклучиво од перспектива на возачот.“
„Три тренинзи можат да станат здодевни“
Верстапен не е ниту голем приврзаник на традиционалниот викенд со три слободни тренинзи.
„Три тренинзи можат да станат малку здодевни. Веројатно тоа е малку премногу. Би сакал да се ослободиме од тоа“, објасни тој.
Така, неговиот идеален формат се наоѓа некаде меѓу двата актуелни концепта. Не сака три слободни тренинзи, но кога би се прашувале само возачите, не би му бил потребен ниту спринтот. Еден тренинг, квалификации и трка би биле сосема доволни.
Верстапен со критика за актуелните болиди
Кога Верстапен беше прашан дали Портимао би им одговарал на актуелните болиди, Холанѓанецот ја даде можеби највпечатливата реченица во целиот разговор.
„Па, овие болиди не одговараат на ништо“, кратко одговори тој.
Верстапен се осврна и на можноста возачите со својот стил да направат разлика. Смета дека карактеристиките на болидите во одредени ситуации, особено во квалификациите, ги принудуваат возачите да возат на многу сличен начин.
„Најбрзите возачи не возат така. Особено во квалификациите доаѓате до одредена точка каде што физички речиси и не можете да направите разлика бидејќи болидот мора да го возите на одреден начин, а потоа речиси сите можат да го прават тоа.“
Токму можноста возачот да направи разлика е една од работите што Верстапен очигледно сака да ги гледа повеќе во Формула 1.
